काठमाडौं – काठमाडौं महानगरपालिका–१०, शंखमूलस्थित भ्याली ब्वाइज होस्टलमा कुटपिट तथा धारिलो हतियार प्रहारबाट एक युवकको मृत्यु भएको छ।
घटनामा संलग्न रहेको आरोपमा प्रहरीले एक जनालाई पक्राउ गरेको छ भने अर्का एक जना फरार छन्।
मृत्यु हुनेमा दाङको घोराही उपमहानगरपालिका–१७ स्थायी घर भई हाल उक्त होस्टलमा बस्दै आएका २२ वर्षीय वसन्त कालाथोकी रहेका छन्।
प्रहरीका अनुसार सोही होस्टलमा बस्ने बाराको कलैया उपमहानगरपालिका–३ घर भएका १८ वर्षीय शेखर यादव र करिब २० वर्षीय प्रमित पटेलले कालाथोकीमाथि कुटपिट गर्नुका साथै धारिलो हतियार प्रहार गरेको प्रारम्भिक अनुसन्धानबाट खुलेको छ।
आक्रमणबाट कालाथोकीको टाउको र घाँटीमा गम्भीर चोट लागेको थियो। बोल्न नसक्ने अवस्थामा रहेका उनलाई तत्काल उद्धार गरी उपचारका लागि मीनभवनस्थित निजामती कर्मचारी अस्पताल पुर्याइएको थियो।
घटनामा संलग्न रहेको आरोपमा प्रहरीले १८ वर्षीय शेखर यादवलाई नियन्त्रणमा लिएको छ। उनीसँग घटनाको कारण, प्रयोग गरिएको हतियार तथा घटनाअघि होस्टलमा भएको गतिविधिबारे सोधपुछ भइरहेको छ।
अर्का आरोपित प्रमित पटेल भने घटनापछि फरार भएका छन्। प्रहरीले उनको सम्भावित आवतजावत हुने स्थानमा खोजी तीव्र बनाउनुका साथै पक्राउका लागि विभिन्न प्रहरी इकाइसँग समन्वय गरिरहेको जनाएको छ।
युवकहरूबीच के विषयमा विवाद भएको थियो र कुटपिट धारिलो हतियार प्रहारसम्म कसरी पुग्यो भन्ने स्पष्ट भइसकेको छैन। घटनाका प्रत्यक्षदर्शी, होस्टल सञ्चालक तथा त्यहाँ बस्ने अन्य व्यक्तिसँग प्रहरीले सोधपुछ गरिरहेको छ।
मृतकको शव कानुनी प्रक्रिया तथा परीक्षणका लागि अस्पतालमा राखिएको छ। घटनामा संलग्न अन्य व्यक्ति भए–नभएको तथा होस्टलको सुरक्षा व्यवस्थाबारे समेत अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783779.jpg)
-1786602170.png)
-1786513116.png)
