काठमाडौं– काठमाडौंको वनस्थलीमा डेराकोठाबाट सुनका गरगहना तथा नगद चोरी गरेको आरोपमा प्रहरीले ६ जनालाई नियन्त्रणमा लिएको छ।
जिल्ला प्रहरी परिसर काठमाडौंका अनुसार काठमाडौं महानगरपालिका–१६, वनस्थलीमा डेरामा बस्ने एक व्यक्तिको कोठाबाट गरगहना तथा नगद चोरी भएको सूचनाका आधारमा प्रहरी वृत्त बालाजुबाट खटिएको टोलीले अनुसन्धान अघि बढाएको थियो। अनुसन्धानका क्रममा चोरीका गरगहनासहित ६ जनालाई नियन्त्रणमा लिइएको प्रहरीले जनाएको छ।
पक्राउ पर्नेमा काठमाडौं महानगरपालिका–२३ का ५४ वर्षीय विनोद शाक्य, सुनसरी वराहक्षेत्र–७ घर भई काठमाडौं–१६ बस्ने २२ वर्षीय सुविन घिमिरे, मकवानपुर बाग्मती–८ घर भई काठमाडौं बागबजार बस्ने २६ वर्षीय सुरज बिक, काभ्रेपलाञ्चोक बल्देखेदिन्चे घर भई काठमाडौं चमती बस्ने २६ वर्षीय सञ्जय तामाङ, काठमाडौं महानगरपालिका–१५ का ३५ वर्षीय रवि महर्जन र सोही ठाउँका ३६ वर्षीय रविन महर्जन रहेका छन्।
प्रहरीका अनुसार विनोद शाक्य सुनचाँदी पसल सञ्चालक हुन् भने सुविन, सुरज, सञ्जय र रविन चोरीमा संलग्न रहेको तथा रवि चोरीका सामान बेचबिखनमा संलग्न रहेको खुलेको छ।
प्रहरीले उनीहरूको साथबाट मोती हार, हसुली माला, मोतीको माला जडित लकेट, खुकुरी कोटपिन, हरियो माला, मंगलसूत्र, सी माला, नेक्लेस, नवरत्न माला, रातो मंगलसूत्र, गोलो औंठी, चन्द्रमा, बक्स औंठी, तीन लियर माला, सोले गेडी माला, लक्ष्मी माला र सोली मालालगायतका विभिन्न गरगहना बरामद गरेको जनाएको छ।
प्रहरीका अनुसार घटनामा संलग्न रविन र सञ्जय यसअघि नै लागुऔषध तथा चोरीसम्बन्धी मुद्दामा पक्राउ परी प्रहरी वृत्त स्वयम्भूको हिरासतमा रहेका थिए। यस्तै, सुविन र सुरज अभद्र व्यवहार गर्न नहुने कसूरमा प्रहरी वृत्त बालाजुको हिरासतमा रहेको प्रहरीले जनाएको छ।
पक्राउ परेकाविरुद्ध काठमाडौं जिल्ला अदालतबाट चोरीसम्बन्धी कसूरमा तीन दिनको म्याद थप अनुमति लिई थप अनुसन्धान भइरहेको जिल्ला प्रहरी परिसर काठमाडौंले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
