काठमाडौं– दक्षिणी पेरुको एन्डिज पर्वतीय क्षेत्रमा बिहीबार ६.७ म्याग्निच्युडको शक्तिशाली भूकम्प गएको छ। भूकम्पका कारण कम्तीमा दुई जना घाइते भएका छन् भने दर्जनौँ घर, स्वास्थ्य केन्द्र र विद्यालयमा क्षति पुगेको स्थानीय अधिकारीहरूले बताएका छन्।
अमेरिकी भूगर्भ सर्वेक्षण (युएसजीएस) का अनुसार स्थानीय समयअनुसार दिउँसो १ बजे गएको भूकम्पको केन्द्रबिन्दु आयाकुचो क्षेत्रको पारिनाकोचास प्रान्तस्थित उपाहुआचो सहरबाट करिब ३८ किलोमिटर उत्तरपश्चिममा थियो। भूकम्प ६६ किलोमिटर गहिराइमा गएको थियो।
दक्षिणी पेरुका इका, अरेकिपा, हुआन्काभेलिका, अपुरिमाक र कुस्कोसहित राजधानी लिमा क्षेत्रमा समेत भूकम्पको धक्का महसुस गरिएको थियो।
सिभिल डिफेन्स प्रमुख लुइस भास्केजका अनुसार पारिनाकोचास प्रान्तको राजधानी कोराकोरा क्षेत्रमा भूकम्पपछि घरबाट बाहिर निस्कने क्रममा दुई जना घाइते भएका छन्।
अधिकारीहरूका अनुसार आयाकुचो र कुस्कोका विभिन्न जिल्लामा २२ वटा घर, छवटा स्वास्थ्य केन्द्र र एउटा विद्यालयमा क्षति पुगेको छ। प्रभावित क्षेत्रहरूमा पु्कियो, पुल्लो, कोराकोरा, उपाहुआचो, सान पेद्रो र पिचारी रहेका छन्।
कोराकोरा आसपासका पहाडी क्षेत्रमा पहिरो तथा ढुंगा खस्ने घटना पनि भएको बताइएको छ। पेरुको नौसेनाले भने भूकम्पपछि सुनामीको खतरा नरहेको स्पष्ट पारेको छ।
पेरु प्रशान्त महासागर वरपर फैलिएको ‘रिङ अफ फायर’ क्षेत्रमा पर्ने भएकाले त्यहाँ भूकम्पको जोखिम उच्च छ र पटक–पटक शक्तिशाली भूकम्प जाने गर्छन्।
यसअघि सन् २००७ मा इका क्षेत्रमा गएको ७.९ म्याग्निच्युडको भूकम्पमा करिब ६०० जनाको ज्यान गएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
