वीरगञ्ज– बाराको जितपुरसिमरा उपमहानगरपालिका–१ भक्तिनगरमा तीन वर्षीया बालिकाको हत्या भएको छ ।
प्रारम्भिक अनुसन्धानका क्रममा बालिकालाई चकलेटको प्रलोभन देखाएर लगेर बलात्कारपछि हत्या गरेको खुलेपछि प्रहरीले एक किशोरसहित दुई जनालाई पक्राउ गरेको छ ।
प्रहरीका अनुसार जितपुरसिमरा–१ दसधुरी बस्ने मनमती चौधरीकी तीन वर्षीया छोरी गरिमा चौधरी साउन ३१ गते बिहान करिब ८ः३० बजेदेखि हराएकी थिइन् । परिवारले खोजी गरिरहेको अवस्थामा भदौ २ गते साँझ करिब ५ः४५ बजे भक्तिनगरस्थित वीरबहादुर रोकाको टायलले छाएको एकतले घरको खाली कोठाभित्र बालिका मृत अवस्थामा फेला परेकी थिइन् ।
बालिका मृत अवस्थामा फेला परेको सूचना प्राप्त भएपछि इलाका प्रहरी कार्यालय सिमराबाट प्रहरी नायब उपरीक्षक दिलीप क्षेत्रीको कमाण्डमा प्रहरी र सोको (SOCO) टोली घटनास्थल पुगेको थियो । जिल्ला प्रहरी कार्यालय बाराबाट प्रहरी उपरीक्षक नरेन्द्र कुँवरको कमाण्डमा थप अनुसन्धान टोलीसमेत घटनास्थलमा खटाइएको थियो ।
घटनाको अनुसन्धानका क्रममा नेपाल प्रदेश प्रहरी कार्यालय पर्सा, वीरगञ्जबाट तालिम प्राप्त कुकुरसहितको टोलीसमेत परिचालन गरिएको प्रहरीले जनाएको छ ।
प्रारम्भिक अनुसन्धानबाट बालिकालाई जितपुरसिमरा–२ बस्ने भीमसेन थापाका करिब १६ वर्षीय छोरा सुमन थापाले चकलेट दिएर ललाई–फकाई घटनास्थलमा लगेको खुलेको प्रहरीले जनाएको छ । त्यसपछि बालिकामाथि जबर्जस्ती करणी गरी हत्या गरेको आशंकामा प्रहरीले अनुसन्धान अघि बढाएको छ ।
घटनामा संलग्न रहेको आरोपमा प्रहरीले सुमन थापालाई पक्राउ गरेको छ । त्यसैगरी ना.१ ज ७७५८ नम्बरको म्याजिकका धनी जितपुरसिमरा–१ निवासी २४ वर्षीय प्रोग्रेस चौधरीलाई समेत प्रहरीले पक्राउ गरेको छ ।
प्रहरीले दुवै जनालाई नियन्त्रणमा लिएर घटनाबारे थप अनुसन्धान गरिरहेको जनाएको छ । बालिकाको शव परीक्षण तथा घटनाको थप अनुसन्धानपछि घटनाको विस्तृत विवरण खुल्ने प्रहरीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
