काठमाडौं– नेपाली कांग्रेसका नेता डा. प्रकाशशरण महतले बदलिँदो आर्थिक तथा भूराजनीतिक परिवेशअनुसार पार्टीको आर्थिक तथा सामाजिक नीतिलाई समयसापेक्ष र गतिशील बनाउनुपर्ने बताएका छन् ।
कांग्रेस इतरपक्षको राष्ट्रिय भेलाको दोस्रो दिन शनिबार ‘कांग्रेसको आर्थिक तथा सामाजिक नीतिको कार्यदिशा’ प्रस्तुत गर्दै महतले पार्टी सत्तामा नरहेको वर्तमान समय आत्मसमीक्षा गर्ने अवसरसमेत भएको बताए।
उनले बदलिँदो भूराजनीतिक परिवेशले सिर्जना गरेका आर्थिक चुनौती, बढ्दो जनआकांक्षा र तीव्र गतिमा भइरहेको प्रविधिको विकासलाई ध्यानमा राख्दै प्रजातान्त्रिक समाजवादमा आधारित आर्थिक नीतिको समयसापेक्ष स्वरूपबारे गम्भीर हुनुपर्ने बताए ।
महतले प्रजातान्त्रिक समाजवादको मूल लक्ष्य आर्थिक समृद्धि हासिल गर्नु र त्यसको लाभ समाजका हरेक वर्ग, समूह तथा भौगोलिक क्षेत्रमा रहेका नागरिकसम्म पुर्याउनु रहेको बताए ।
प्रजातान्त्रिक मूल्य र मान्यतामा आधारित उक्त लक्ष्य अपरिवर्तनीय भए पनि लक्ष्य प्राप्त गर्ने आर्थिक तथा सामाजिक नीति भने परिस्थितिअनुसार परिवर्तन हुँदै जानुपर्ने उनको भनाइ छ । ‘प्रजातान्त्रिक समाजवादको मूल लक्ष्यलाई यथावत राख्ने, तर कार्यान्वयनका नीतिगत विषयमा समयसापेक्ष र गतिशील भएर अगाडि बढ्ने प्रतिबद्धता गर्नुपर्छ,’ महतले भने ।
उनले वर्तमान अवस्थामा देखिएको आर्थिक वृद्धिको गतिरोध र उत्पादनशील तथा गुणस्तरीय रोजगारीको समस्यालाई समाधान गर्नुपर्नेमा जोड दिए । आर्थिक वृद्धि र रोजगारी सिर्जना गर्ने समयसापेक्ष नीति अवलम्बन गर्नुपर्ने उनको भनाइ छ ।
महतले पछाडि परेका क्षेत्र, वर्ग तथा समूह र गरिबीको रेखामुनि रहेका नेपालीको आर्थिक तथा सामाजिक स्तर उकास्न लक्षित आर्थिक तथा सामाजिक नीति आवश्यक रहेको बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786709750-1786775610.jpeg)
-1786771851.jpg)
-1786602170.png)
-1786513116.png)
