काठमाडौं– भारतीय प्रधानमन्त्री नरेन्द्र मोदीले पछिल्ला १२ वर्षमा भारतले विकासको नयाँ गति हासिल गरेको दाबी गरेका छन् ।
भारतको ८०औँ स्वतन्त्रता दिवसका अवसरमा लालकिल्लाको प्राचीरबाट राष्ट्रलाई सम्बोधन गर्दै उनले सरकारका विभिन्न उपलब्धिहरूको चर्चा गरेका हुन् ।
सम्बोधनका क्रममा मोदीले देशवासीको संकल्प, मेहनत र प्रयासका कारण भारतले विकासका क्षेत्रमा उल्लेख्य प्रगति गरेको बताए । उनले पछिल्ला १२ वर्षमा आफ्नो सरकारले अघि बढाएका विभिन्न कार्यक्रम तथा योजनाका कारण देशको अर्थतन्त्र र पूर्वाधार क्षेत्रमा परिवर्तन आएको दाबी गरे ।
प्रधानमन्त्री मोदीले भने, ‘पछिल्ला १२ वर्षमा २५ करोड देशवासी गरिबीबाट बाहिरिएका छन् । देशवासीको प्रयासको परिणामस्वरूप भारत ठूलो र तीव्र गतिमा बढिरहेको अर्थतन्त्रमा रूपान्तरण भएको छ ।’
उनले स्वतन्त्रतापछि लामो समयसम्म भारत अपेक्षित गतिमा अघि बढ्न नसकेको बताए । सन् २०१४ सम्म भारतलाई विश्वले ‘फ्राजाइल फाइभ’ अर्थात् कमजोर पाँच अर्थतन्त्रको सूचीमा राखेको उल्लेख गर्दै उनले पछिल्ला १२ वर्षमा देशले नयाँ गति हासिल गरेको दाबी गरे ।
प्रधानमन्त्री मोदीले आफ्नो सरकारको कार्यकालमा विभिन्न क्षेत्रमा भएको प्रगतिबारे पनि चर्चा गरे । उनले भने, ‘पछिल्ला १२ वर्षमा रक्षा उत्पादन चार गुणा, खादी तथा ग्रामोद्योगको कारोबार पाँच गुणा र मोबाइल फोनको उत्पादन ३३ गुणाले बढेको छ । डिजिटल नवप्रवर्तनको क्षेत्रमा पनि भारतले आफ्नो पहिचान बनाएको छ ।’
उनका अनुसार भारतमा पेटेन्ट स्वीकृतिको संख्या चार गुणा र डिजिटल कारोबार १०० गुणाले बढेको छ । प्रधानमन्त्री मोदीले प्रत्येक वर्ष औसतमा १५ गुणा तीव्र गतिमा नागरिकका घरमा धारामार्फत खानेपानी पुर्याइएको दाबी गरे ।
उनले गरिबका लागि शौचालय र घर निर्माणको गतिबारे पनि उल्लेख गरे । उनका अनुसार गरिबका लागि शौचालय र घर निर्माणको काम चार गुणा तीव्र गतिमा गरिएको छ । यससँगै भारतमा मेट्रो सञ्जालको पनि तीव्र विस्तार भएको उनले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786771851.jpg)
-1786602170.png)
-1786513116.png)
