काठमाडाैं – इन्डोनेसियाको पूर्वी क्षेत्रमा पर्ने फ्लोरेस द्वीप नजिकै ७.७ म्याग्निच्युडको शक्तिशाली भूकम्प गएको छ।
भूकम्पका कारण कम्तीमा दुई जनाको मृत्यु भएको छ भने एक जना घाइते भएका छन् ।
अमेरिकी भूगर्भ सर्वेक्षण (यूएसजीएस) का अनुसार स्थानीय समयअनुसार शनिबार बिहान ५ बजेर ५८ मिनेटमा भूकम्प गएको हो । भूकम्पको केन्द्रविन्दु पूर्वी नुसा तेङ्गारा प्रान्तको एन्दे सहरबाट करिब ६८ किलोमिटर उत्तर–पश्चिममा र जमिनको सतहबाट करिब १० किलोमिटर गहिराइमा रहेको थियो ।
इन्डोनेसियाको राष्ट्रिय विपद् व्यवस्थापन एजेन्सीका अनुसार माउमेरे बन्दरगाह क्षेत्रमा एक पुरुष र एक महिलाको मृत्यु भएको छ । भूकम्पमा परी एक जना घाइते भएका छन् ।
मुख्य भूकम्पपछि लगातार शक्तिशाली पराकम्पहरू समेत महसुस भएका छन् । भूकम्प गएको करिब आधा घण्टाभित्र ५.९, ५.६ र ६.१ म्याग्निच्युडका पराकम्प गएको बताइएको छ । लगातारका पराकम्पका कारण प्रभावित क्षेत्रमा थप क्षति हुनसक्ने भन्दै स्थानीय अधिकारीहरूले सतर्कता अपनाउन आग्रह गरेका छन् ।
भूकम्पका कारण माउमेरे क्षेत्र तथा बन्दरगाह आसपासका थुप्रै घर र अन्य भौतिक संरचनामा क्षति पुगेको स्थानीय सञ्चारमाध्यमहरूले जनाएका छन् । क्षतिको पूर्ण विवरण भने संकलन भइरहेको छ ।
फ्लोरेस क्षेत्र भूकम्पीय दृष्टिले निकै संवेदनशील मानिन्छ। यस क्षेत्रमा विगतमा पनि शक्तिशाली भूकम्प र सुनामीका कारण ठूलो जनधनको क्षति भएको थियो । सन् १९९२ मा यही क्षेत्रमा ७.७ म्याग्निच्युडको भूकम्पपछि आएको सुनामीमा ठूलो क्षति भएको थियो ।
यसपटक पनि शक्तिशाली भूकम्पपछि इन्डोनेसियाको मौसम तथा भूगर्भ एजेन्सीले प्रभावित तटीय क्षेत्रमा सुनामीको चेतावनी जारी गरेको थियो । एजेन्सीले सर्वसाधारणलाई नदी किनार तथा समुद्री तटबाट टाढा रहन र सम्भव भएसम्म उच्च भूभागतर्फ जान आग्रह गरेको थियो ।
भूकम्पपछि प्रभावित क्षेत्रमा उद्धार तथा क्षतिको विवरण संकलनको काम भइरहेको छ । अधिकारीहरूले पराकम्पको जोखिम कायमै रहेकाले सर्वसाधारणलाई सतर्क रहन आग्रह गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786766293.jpg)
-1786602170.png)
-1786513116.png)
