हेटौँडा– मकवानपुरको हेटौँडा उपमहानगरपालिका–१० स्थित बसपार्कमा गाडी पार्किङको विषयमा भएको विवादका क्रममा धारिलो हतियार प्रहार हुँदा चार जना घाइते भएका छन्। घटनामा संलग्न रहेको आशंकामा प्रहरीले चार जनालाई नियन्त्रणमा लिएर अनुसन्धान अघि बढाएको छ।
प्रहरीका अनुसार शुक्रबार बिहान करिब ११:३० बजे मनहरी गाउँपालिका–१ मकरीका करिब ३१ वर्षीय लक्ष्मण बर्तौलासहितका व्यक्तिबीच गाडी पार्किङको विषयमा विवाद भएको थियो। विवादका क्रममा धारिलो हतियार प्रहार हुँदा चार जना घाइते भएका हुन्।
घाइते हुनेमा मनहरी गाउँपालिका–६ का २७ वर्षीय जीवन गोले, ओखलढुङ्गा सिंहदेवी गाउँपालिका–७ का २८ वर्षीय राइज आले मगर, चितवन राप्ती नगरपालिका–२ मिलनटोलका ३२ वर्षीय रामबहादुर पाख्रीन र राप्ती नगरपालिका–४ डडुवाका २८ वर्षीय जीवन तामाङ छन्।
गोले र पाख्रीनको अवस्था मध्यम तथा आले मगर र तामाङको अवस्था सामान्य रहेको प्रहरीले जनाएको छ। चारै जनालाई हेटौँडामा सामान्य उपचारपछि थप उपचारका लागि चितवन पठाइएको छ।
घटनापछि प्रहरीले खोजतलास तथा अनुसन्धान अघि बढाउने क्रममा हेटौँडा–१२ पदमपोखरीका ३३ वर्षीय सुनिल थिङ, हेटौँडा–१५ भोर्लेका २८ वर्षीय करण लामा र मनहरी–१ मकरीका २३ वर्षीय उज्ज्वल बर्तौलालाई नियन्त्रणमा लिएको छ।
यसैगरी घटनामा संलग्न रहेको शंकाका आधारमा भक्तपुर सूर्यविनायक नगरपालिका–२ का ३७ वर्षीय लक्ष्मण विष्टलाई समेत नियन्त्रणमा लिएर अनुसन्धान भइरहेको प्रहरीले जनाएको छ।
नियन्त्रणमा लिइएका सबैलाई जिल्ला प्रहरी कार्यालय मकवानपुरमा राखिएको छ। घटनामा संलग्न अन्य व्यक्तिहरूको समेत खोजतलास भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
