काठमाडौं– नेपाल राष्ट्र बैंकले नेपाल इन्भेस्टमेन्ट मेगा बैंक लिमिटेडका सञ्चालक तथा प्रमुख कार्यकारी अधिकृतविरुद्ध काठमाडौं जिल्ला अदालतमा अभियोगपत्र दायर भएको विषयमा आफ्नो ध्यानाकर्षण भएको जनाएको छ।
राष्ट्र बैंकले बिहीबार जारी गरेको प्रेस विज्ञप्तिमार्फत बैंकको सञ्चालन तथा व्यवस्थापनका सम्बन्धमा आफूले नजिकबाट अनुगमन गरिरहेको र विद्यमान कानुनी व्यवस्थाका सन्दर्भमा आवश्यक राय–सुझावका लागि छलफल भइरहेको जनाएको हो।
केन्द्रीय बैंकका अनुसार हाल बैंकको तरलताको अवस्था लगायत वित्तीय सबलताका परिसूचकहरू तोकिएको मापदण्डअनुसार सन्तोषजनक अवस्थामा रहेका छन्। बैंकको दैनिक कार्य सञ्चालनमा कुनै पनि प्रकारको जटिलता उत्पन्न भएको अवस्था नरहेको राष्ट्र बैंकले स्पष्ट पारेको छ।
राष्ट्र बैंकले काठमाडौं जिल्ला अदालतमा मुद्दा विचाराधीन रहेको अवस्थालाई समेत ध्यानमा राख्दै बैंकको सञ्चालनको दैनिक अवस्थासहित मुद्दाको प्रकृति, समयावधि र गाम्भीर्यका आधारमा थप छलफल तथा कानुनी राय लिइने जनाएको छ।
त्यसका आधारमा बैंकको सञ्चालक समिति, उच्च व्यवस्थापन तथा बैंक सञ्चालनसँग सम्बन्धित आवश्यक उपाय अवलम्बन गरिने राष्ट्र बैंकले जनाएको छ।
राष्ट्र बैंकको विज्ञप्तिले बैंकविरुद्धको मुद्दाका कारण तत्काल बैंकको नियमित कारोबार प्रभावित हुने अवस्था नरहेको संकेत गरेको छ। केन्द्रीय बैंकले बैंकको वित्तीय अवस्था र सञ्चालनमा निरन्तर निगरानी भइरहेको पनि जनाएको छ।
राष्ट्र बैंकले २०८३ साउन २८ गते उक्त प्रेस विज्ञप्ति जारी गरेको हो। बैंकका अध्यक्ष, सीईओ तथा सञ्चालकहरूविरुद्धको विषयमा अदालतको प्रक्रिया अघि बढिरहेका बेला राष्ट्र बैंकको यस्तो धारणा सार्वजनिक भएको हो। अदालतले पनि अनुसन्धानको विषयमा दुवै पक्षलाई छलफलका लागि बोलाएको र अनुसन्धान रोक्ने आदेश नदिएको सार्वजनिक विवरणहरूमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786622145.jpg)
-1786602170.png)
-1764146706.png)
-1786513116.png)
