काठमाडौं– प्रहरीले काठमाडौं र सर्लाहीबाट १ करोड ३२ लाख बढी स्रोत नखुलेको नगदसहित तीन जनालाई नियन्त्रणमा लिएको छ ।
प्रहरीका अनुसार साउन २६ गते काठमाडौंको कुलेश्वरबाट फलफूल मण्डीस्थित आँचल फ्रुट सेन्टर पसलबाट ८१ लाख बढी स्रोत नखुलेको रकम बरामद गरेको थियो ।
हुन्डी कारोबार भइरहेको छ भन्ने सूचनाका आधारमा प्रहरीको काठमाडौं उपत्यका अपराध अनुसन्धान महाशाखा र प्रहरी वृत्त कालीमाटीबाट खटिएको टोलीले पर्साको छिपहरमाई–१ घर भइ कुलेश्वरमा उक्त फलफूल पसल गर्दै आएका ३३ वर्षीय जितेन्द्र साह तुरहाको पसल र उनी बस्दै आएको डेरामा खानतलासी गरेको थियो ।
उक्त खानतलासीमा स्रोत नखुलेको ७६ लाख २७ हजार ३ सय नेपाली रुपैयाँ र ३ लाख ४ हजार ३ सय भारतीय रुपैयाँ फेला पारी तुरहालाई नियन्त्रणमा लिएको थियो । अदालतबाट चार दिनको म्याद अनुमति लिएर अनुसन्धान भइरहेको प्रहरीले जनाएको छ ।
यस्तै सर्लाही ब्रह्मपुरी गाउँपालिका–२ स्थित राजदेवी मन्दिर अगाडि स्रोत नखुलेको ५१ लाख ३४ हजार रुपैयाँसहित एक जनालाई पक्राउ गरिएको छ ।
जिल्ला प्रहरी कार्यालय सर्लाहीबाट खटिएको प्रहरी टोलीले भेल्हीबाट वयलबासतर्फ जाँदै गरेको ज.१० प ८६५२ नम्बरको स्कुटरलाई रोकी चेकजाँच गर्ने क्रममा स्कुटरको डिकी, अन्य फर्स्ट बटन तथा बोकी ल्याएको कालो झोलाभित्र लुकाइछिपाई राखेको स्रोत नखुलेको नेपाली रुपैयाँ ५१ लाख ३४ हजार बरामद गरेको हो ।
बरामद रकममा १ हजार रुपैयाँ दरका ३ हजार ५०० थान, ५०० रुपैयाँ दरका ३ हजार १०८ थान, १०० रुपैयाँ दरका ७०० थान र ५० रुपैयाँ दरका २०० थान नोट रहेका छन् ।
नियन्त्रणमा लिने क्रममा स्कुटर आफैं अनियन्त्रित भई दुर्घटना हुँदा चालक महोत्तरीको गौशाला नगरपालिका–१२ बस्ने अन्दाजी ५७ वर्षीय जगन्नाथ महतो कोईरी घाइते भएका थिए । उनलाई प्रादेशिक अस्पताल मलंगवा, सर्लाहीमा सामान्य उपचारपछि थप उपचारका लागि म्याक्स अस्पताल, मलंगवा लगिएकोमा उपचार भइरहेको छ। उनको अवस्था सामान्य रहेको छ ।
उनलाई नियन्त्रणमा लिने क्रममा जिल्ला प्रहरी कार्यालय सर्लाहीबाट खटिएका प्रहरी सहायक हवल्दार राजेशकुमार यादव र प्रहरी जवान रामचन्द्रलाई समेत सामान्य चोट लागेको थियो । उनीहरू प्रादेशिक अस्पताल मलंगवामा उपचारपछि डिस्चार्ज भएका छन् । बरामद रकम, स्कुटर र जगन्नाथ महतो कोईरीलाई नियन्त्रणमा लिई घटनाबारे थप अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786513116.png)
