इरानको सर्वोच्च राष्ट्रिय सुरक्षा परिषद्का सचिव मोहम्मद बगर जुलघाद्रले होर्मुज जलडमरू तबसम्म नखुल्ने बताएका छन्, जबसम्म अमेरिकाले उनका ६ माग पूरा गर्दैन।
बीबीसी फारसीका अनुसार ती मागमा इरानमाथि लगाइएका प्रतिबन्धमा ढिलाइ, युद्धमा भएको क्षतिको क्षतिपूर्ति, इरानी बन्दरगाहको नौसैनिक नाकाबन्दी तत्काल हटाउने, इरानविरुद्धका धम्की रोक्ने र देशको जफत सम्पत्ति फुकुवा गर्नेलगायत छन्।
विश्लेषकहरूका अनुसार जुलघाद्रले धेरै हदसम्म इरानका यसअघिका माग नै दोहोर्याएका छन्। तर यसले वार्तामा होर्मुज जलडमरूलाई लिएर इरानको कडा रुखको संकेत गरेको छ।
यो बयान त्यस्तो समयमा आएको हो, जतिबेला इरान र ओमानले होर्मुज हुँदै जहाज आवतजावतका लागि नयाँ व्यवस्थाबारे भएको पछिल्लो वार्तालाई 'सकारात्मक र रचनात्मक' भनेका छन्।
इरानी विदेशमन्त्री अब्बास अराघ्चीले ओमानसँगको वार्ता अन्तिम चरणमा पुगेको बताएका छन्। तर उनले सम्झौतामा पुग्दैमा होर्मुज जलडमरू तत्काल खुल्ने नभएको र यो जलमार्ग पुनः खुल्नु 'अन्य सर्तमा निर्भर' रहेकोमा जोड दिएका छन्।
यसअघि समाचार एजेन्सी रोयटर्सले एक अमेरिकी अधिकारीलाई उद्धृत गर्दै होर्मुज जलडमरूलाई लिएर इरान र ओमानबीच भएको वार्तामा प्रगति भएको र अमेरिकाले चाँडै सम्झौता हुने अपेक्षा गरेको जनाएको थियो।
अधिकारीका अनुसार होर्मुज हुँदै व्यावसायिक जहाजलाई निर्बाध आवतजावतको ग्यारेन्टी गर्ने सम्झौताको घोषणा भएपछि अमेरिकाले इरानी बन्दरगाहमाथिको नाकाबन्दी हटाउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
