काठमाडौं– सरकारले राष्ट्रसेवक कर्मचारीहरूको नयाँ तलबमान स्वीकृत गरेको छ। प्रधानमन्त्री तथा मन्त्रिपरिषद्को कार्यालयले अर्थ मन्त्रालयबाट सिफारिस भएको नयाँ तलबमान स्वीकृत गरी कार्यान्वयनका लागि पठाएको हो।
अर्थ मन्त्रालयले गत साउन ६ गते पठाएको नयाँ तलबमान मन्त्रिपरिषद्ले करिब १५ दिनपछि स्वीकृत गरेको हो।
स्वीकृत नयाँ तलबमानअनुसार सबैभन्दा बढी तलब मुख्य सचिवले पाउनेछन्। मुख्य सचिवको मासिक तलब ९० हजार ५ सय ९४ रुपैयाँ कायम गरिएको छ। यस्तै, सबैभन्दा कम प्रथम स्तरका कार्यालय सहयोगीको तलब २८ हजार ९ सय ८४ रुपैयाँ हुनेछ।
नेपाली सेनाका प्रधान सेनापतिको तलब पनि मुख्य सचिवसरह ९० हजार ५ सय ९४ रुपैयाँ कायम गरिएको छ। नेपाल प्रहरीका प्रहरी महानिरीक्षक (आईजीपी) को मासिक तलब भने ८४ हजार ५ सय ७६ रुपैयाँ हुनेछ।
सरकारले चालु आर्थिक वर्षदेखि लागू हुने गरी कर्मचारीको तलबमा १० प्रतिशत वृद्धि गरेको थियो। त्यसैगरी प्रोत्साहन भत्ताबापत थप १० प्रतिशत रकम उपलब्ध गराउने निर्णय गरिएको थियो।
यसैगरी पेन्सन प्राप्त गर्नेहरूको हकमा पनि १० प्रतिशत वृद्धि लागू हुने व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
