काठमाडौं– सुनसरीको देवानगन्जस्थित कप्तानगन्ज झडपमा आइतबार राति ज्यान गुमाएका ओमप्रकाश मेहताका आफन्तजनले सरकारसामु माग पेस गरेका छन्।
मंगलबार मृतक मेहताका परिवारलाई भेट्न देवानगन्ज ४ स्थित घरैमा पुगेका सुनसरीका प्रमुख जिल्ला अधिकारी ईश्वरीप्रसाद अर्याल सहितको प्रशासन तथा सुरक्षा टोलीलाई आफन्तजनले ज्ञापनपत्र बुझाएका हुन्।
देवानगन्ज गाउँपालिका अध्यक्ष बेचनप्रसाद मेहताले दिएको जानकारी अनुसार पीडित परिवारले ९ बुँदे माग पत्र प्रजिअलाई बुझाएका हुन्।
पीडित पक्षले प्रमुख जिल्ला अधिकारीसमक्ष राखेका ९ बुँदे मागको पहिलो बुँदामा प्रहरीको गोली लागेर ज्यान गुमाएका ओमप्रकाश मेहतालाई तत्काल सहिद घोषणा गर्न र पीडित परिवारलाई उचित क्षतिपूर्ति प्रदान गर्न माग गरिएको छ।
दोस्रो बुँदामा घटनामा परी गम्भीर घाइते भई विराटनगरका न्युरो लगायत विभिन्न अस्पतालमा उपचाररत जयप्रकाश मेहता, रविन महतो सहितका घाइतेहरूको सम्पूर्ण उपचार खर्च राज्यले व्यहोर्ने ग्यारेन्टी गर्न माग गरिएको छ।
अर्को बुँदामा पीडितहरूले केही स्थानीयको नाम किटान गरेर कारबाहीको माग गरेका छन्। इलाका प्रहरी कार्यालय देवानगन्जका इन्चार्ज इन्स्पेक्टर राकेश राईलाई भ्रामक सूचना दिएर बोलाइएको र उनले कुनै सोधपुछ नगरी लाठीचार्ज गर्दा स्थिति बिग्रेको ज्ञापनपत्रमा उल्लेख छ।
झडपमा टाउको फुटेका इन्स्पेक्टर राईको उक्साहटमा खटिएका सशस्त्र प्रहरीले ताकी–ताकी गोली चलाएको आरोप लगाउँदै घटनामा संलग्न सम्पूर्ण प्रहरी प्रशासनमाथि कडा कारबाहीको माग ज्ञापनमा उल्लेख छ।
घटनाको दिन साँझ ८ बजेदेखि पटक पटक बिजुली काटिएको बताउँदै पीडितहरूले विद्युत प्राधिकरणका ड्युटी कर्मचारीको मोबाइल कल डिटेल तथा घटनामा संलग्न व्यक्तिहरूको कल डिटेल निकालेर छानबिन माग गरेका छन्।
ज्ञापनमा १५ दिन अघिदेखि नै वातावरण बिगार्ने प्रयास भइरहँदा पनि सुरक्षा व्यवस्था नमिलाएको र सीमापारिको अवैध तस्करीको आर्थिक प्रलोभनमा परी एकपक्षीय पक्षधरता देखाएको भन्दै इलाका प्रहरी इन्चार्ज र सशस्त्र प्रहरीका जिम्मेवार अधिकारीमाथि कारबाहीको माग गरिएको छ।
त्यस्तै स्थानीय क्षेत्रमा शंकास्पद गतिविधि, अवैध हातहतियार र अपरिचित व्यक्तिहरूको आवतजावत नियन्त्रण गर्न पनि माग गरिएको छ।
प्रहरी र स्थानीय प्रशासनको गैरजिम्मेवारपूर्ण रवैयाका कारण आक्रोशित जनसमुदायले गरेको प्रदर्शन क्रममा भएको तोडफोड तथा आगजनीको जिम्मा सरकारले लिनुपर्ने र प्रदर्शनमा ओर्लेका मानिसमाथि कुनै पनि प्रकारको झूटा मुद्दा वा कारबाही नगर्ने प्रतिबद्धता राज्यले व्यक्त गर्नुपर्ने माग पनि गरिएको छ।
ज्ञापनपत्र बुझ्दै सुनसरीका प्रमुख जिल्ला अधिकारी अर्यालले पीडितका मागप्रति सकारात्मक रहेको भन्दै सामाजिक सद्भाव र शान्तिसुरक्षा कायम राख्नु अहिलेको प्राथमिक आवश्यकता भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787046114-1787047087.jpeg)
-1786602170.png)
-1786513116.png)
