काठमाडौं । प्रधानमन्त्री वालेन्द्र शाहले पुँजी बजार र धितोपत्र व्यवसायमा देखिएको समस्यालाई समाधान गर्ने प्रतिबद्धता जनाएका छन् ।
सोमबार सिंहदरबारमा पुँजी बजार, धितोपत्र व्यवसाय क्षेत्रका सरोकारवाला निकाय र व्यक्तिहरूसँग छलफल गर्दै प्रधानमन्त्रीले पुँजी बजार र धितोपत्र व्यवसायलाई व्यवस्थित बनाउन काम भइरहेको भन्दै यस क्षेत्रमा देखिएका समस्या समाधान गर्ने प्रतिवद्धता जनाएको सहभागी सरोकारवालाले बताए ।
उनले व्यवसायीहरुका जायज मागहरू कार्यान्वयनमा लैजानका लागि सरोकारवाला निकायलाई बोलाएर छलफल गर्ने प्रतिवद्धता जनाएका छन् ।
छलफलमा प्रधानमन्त्रीले नेपालको पुँजीबजारको दीर्घकालीन विकासका लागि शेयर बजारका सरोकारवालाले उठाउँदै आएका विभिन्न सुझावहरू कार्यान्वयन गर्न सरकार सकारात्मक रहेको बताएका छन् । उनले संस्थागत लगानीकर्ता बढाउनेदेखि नेपाल स्टक एक्सचेञ्ज (नेप्से) को रणनीतिक साझेदारसहित पुनर्संरचना, प्राथमिक निष्कासन प्रणाली सुधार, दोस्रो बजारमा तरलता वृद्धि तथा कर प्रणाली पुनरावलोकनसम्मका विषयमा आवश्यक पहल गरिने बताएका हुन् ।
प्रधानमन्त्रीले नेपालको पुँजीबजारमा संस्थागत लगानीकर्ताको सहभागिता न्यून हुँदा बजार अत्यधिक उतारचढावपूर्ण बनेको उल्लेख गर्दै सञ्चयकोष, नागरिक लगानी कोष, सामाजिक सुरक्षा कोष, बीमा कम्पनी, बैंक तथा वित्तीय संस्थालाई संस्थागत लगानीकर्ता बन्न प्रोत्साहन गरिने बताए ।
प्रधानमन्त्रीले नेपाल स्टक एक्सचेञ्ज (नेप्से) लाई रणनीतिक साझेदारसहित निजीकरण गरी आधुनिक, प्रतिस्पर्धी र व्यावसायिक संस्थाका रूपमा विकास गर्नुपर्ने आवश्यकता औंल्याए। सरकारी संरचनाका कारण निर्णय प्रक्रियामा ढिलाइ, आधुनिक प्रविधि र दक्ष जनशक्ति आकर्षित गर्न कठिनाइ भएको उल्लेख गर्दै पुनर्संरचनामा जोड दिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
