काठमाडौं– ब्राजिलका महान फुटबल खेलाडी पेलेले सन् १९५८ को विश्वकप फाइनलमा लगाएको जर्सी अमेरिकाको न्यु योर्कमा भएको सोथेबीको लिलामीमा ४.९ मिलियन डलर (करिब ७५ करोड ५६ लाख २९ हजार नेपाली रुपैयाँ) मा बिक्री भएको छ ।
यो जर्सी फुटबल इतिहासमा बिक्री भएको दोस्रो सबैभन्दा महँगो जर्सी बनेको छ । यसअघि डिएगो म्याराडोनाले सन् १९८६ को विश्वकपमा इंग्ल्यान्डविरुद्ध ‘ह्यान्ड अफ गड’ गोल गर्दा लगाएको अर्जेन्टिनाको जर्सी ७.१ मिलियन पाउन्डमा बिक्री भएको थियो ।
पेलेको यो जर्सीमा १० वटा बोलपत्र परेको थियो । सन् २००४ मा यही जर्सी १ लाख ५ हजार ६ सय डलरमा बिक्री भएको थियो ।
सन् १९५८ को विश्वकप फाइनलमा १७ वर्षीय पेलेले स्वीडेनविरुद्ध दुई गोल गर्दै ब्राजिललाई पहिलो विश्वकप उपाधि जिताएका थिए । उनको विश्वकप फाइनलमा गोल गर्ने सबैभन्दा कान्छा खेलाडीको कीर्तिमान अझै कायम छ ।
यही लिलामीमा माराडोनाले १९८६ विश्वकपमा लगाएको कप्तानी आर्मब्यान्ड ५ लाख १२ हजार डलरमा, लियोनल मेस्सीले २०१७ मा बार्सिलोनाको पेरिस सेन्ट जर्मेनविरुद्धको ऐतिहासिक पुनरागमन खेलमा लगाएको जर्सी २ लाख १७ हजार ६ सय डलरमा र डेभिड बेकह्यामको इंग्ल्यान्डका लागि ५०औँ खेलमा लगाएको जर्सी ५१ हजार २ सय डलरमा बिक्री भएको बीबीसीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
