काठमाडौं– नेपाल वायुसेवा निगम (नेपाल एयरलाइन्स)ले मध्यपूर्वमा उत्पन्न असहज परिस्थितिका कारण अवरुद्ध रहेको दुबई उडान पुनः सञ्चालन गर्ने भएको छ । निगमले एक सूचना जारी गर्दै मार्च ११ र १२ गतेका लागि काठमाडौं–दुबई दुईतर्फी विशेष उडानको तालिका सार्वजनिक गरेको हो ।
निगमका अनुसार यात्रुहरूको सहजताका लागि काठमाडौं–दुबई उडान ११ मार्च ११ः १५ बजे प्रस्थान समय र १२ मार्चमा स्थानीय समय अनुसार ४: १० बजे उडानहरू सञ्चालन गर्न लागिएको छ । यी उडानहरू निगमको नियमित तालिका अनुसार नै हुनेछन् ।
मध्यपूर्वको तनावका कारण उडान रद्द हुँदा २८ फेब्रुअरीदेखि ९ मार्चसम्म टिकट लिएर पनि यात्रा गर्न नपाएका यात्रुहरूलाई निगमले विशेष प्राथमिकतामा राखेको छ । ती यात्रुहरूमध्ये ११ मार्चमा यात्रा गर्न इच्छुक भएकाहरूलाई ‘पहिलो आउनेलाई पहिलो प्राथमिकता’को आधारमा सिट उपलब्ध गराइने निगमले जनाएको छ ।
यसका लागि यात्रुहरूले आफ्नो टिकट निगमको तोकिएको इमेल ठेगानामा पठाएर पुनः प्रमाणीकरण गराउनुपर्नेछ । प्रमाणीकरण गरिएका यात्रुहरूलाई मात्र विमानस्थल प्रस्थान गर्न निगमले निर्देशन दिएको छ ।
निगमले जारी गरेको सूचनाको नोटमा मध्यपूर्वको सुरक्षा चुनौतीलाई पनि उल्लेख गरिएको छ । सूचनामा भनिएको छ– मध्यपूर्वमा जारी असहज परिस्थिति र सुरक्षाको कारणले जुनसुकै समयमा उडान रद्द हुन सक्नेछ । विषम परिस्थितिका कारण यात्रा अवरुद्ध भएमा निगमले थप कुनै आर्थिक तथा अन्य उत्तरदायित्व वहन गर्न असमर्थ रहने जानकारी गराउँदछौँ ।
मध्यपूर्वमा बढ्दो हवाई असुरक्षाका कारण निगमले उडानहरू पूर्ण रूपमा रद्द गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
