काठमाडौं– हरेक पटकका चुनावमा मत फेरिरहने जुम्लाले यसपटक भने उक्त प्रचलनमा ब्रेक लगाएको छ । अहिलेसम्मका चुनावहरुमा कसैले पनि दोहोरिएर नजितेको जुम्लामा त्यो रेकर्ड ब्रेक गर्ने उम्मेदवार हुन् राष्ट्रिय प्रजातन्त्र पार्टीका प्रवक्ता ज्ञानबहादुर शाही (ज्ञानेन्द्र) ।
अघिल्लो प्रतिनिधि सभा निर्वाचनमा निर्वाचित भएर सदनमा खरो र आक्रामक प्रहारका कारण चर्चामा आएका शाहीले यसपटक पनि बलिया र निर्विकल्प मानिएका नेकपाका नरेश भण्डारीलाई भारी मतान्तरले पछि पार्दै सदनको दोस्रो इनिङ्स सुरु गरे । जम्मा खसेको मत ४० हजार ८८७ मध्ये शाहीले १४ हजार ८ सय १६ मत प्राप्त गरी निर्वाचित भएका हुन् । निर्वाचन कार्यालयका अनुसार उनका प्रतिस्पर्धी नेकपाका नरेश भण्डारीले ११ हजार ५ सय ३५ मत प्राप्त गरेका छन् । विजेता शाही र भण्डारीबीच ३ हजार १ सय ८१ मतान्तर रहेको छ । तेस्रोमा रहेको कांग्रेसका दीपबहादुर शाहीले ७ हजार १४३, नेकपा एमालेका शान्तिलाल महतले ४ हजार ५१८, रास्वपाकी विनिता कठायतले ४२१ मत प्राप्त गरिन् ।
अघिल्लो चुनावमा उनले माओवादी र कांग्रेस गठबन्धनबाट उम्मेदवार बनेकी माओवादीकी गोमा कुँवरलाई हराउँदै राप्रपाका लागि जुम्लाबाट पहिलो संसद् चुनिएका थिए । भलै नाम फरक होस् । तर यसपटक पनि उनका प्रतिस्पर्धी थिए पूर्व माओवादीका नेता नरेश भण्डारी । भण्डारी तिनै नेता हुन्, कर्णाली स्वास्थ्य विज्ञान प्रतिष्ठान स्थापनामा पहल गरेका कारण जिल्लाभर उनलाई सबैले बौद्धिक नेताका रुपमा चिन्छन् । यति मात्र नभई अघिल्लो निर्वाचनमा माओवादीबाट प्रदेश सभामा निर्वाचित भएर आन्तरिक मामिला तथा कानुनमन्त्रीसमेत बने ।
सोही कारण पनि जिल्लामा सबै उम्मेदवार एकातिर भए पनि नरेशलाई हराउन मुस्किल पर्नेछ भन्ने दाबी चुनावअघि हुँदै आएको थियो । तर दरिलो रणनीति र युवामाँझको प्रभावकारिताले उनै भण्डारीलाई शाहीले करिब ३ हजारको मतान्तरले पछि पार्दै जिल्लाबाट एक व्यक्ति सदनमा दोहोरिएर आउनेमा आफ्नो नाम दर्ज गराए ।
लामो भूमिगत आन्दोलन र त्यसपछि केन्द्रीय स्तरको राजनीतिमा आएर जिल्लामा पकड जमाइसकेका नेताका अगाडि ज्ञानेन्द्रको राजनीतिक अनुभव नगन्य जस्तै छ । तर उनी समय र परिस्थिति अनुसार अपडेट छन् । सोही कारण पनि असम्भव लागिरहेको यसपटकको निर्वाचनमा आफूलाई झन् उत्साहका साथ निर्वाचित गराउन सफल भए । यसमा अधिकांश युवा र पुराना पार्टीका नेता कार्यकर्ताको व्यवहारबाट दिक्क भएका जनताको भरपुर साथ रह्यो ।
०४८ साल माघ २४ गते जुम्लाको सिङ्जा गाउँपालिका वडा नम्बर ३ पिगी (साबिक नराकोट गाविस–७) मा जन्मिएका उनी भ्रष्टाचार विरोधी अभियान्ताका रुपमा अघि बढेका थिए । सामाजिक सञ्जाल, टेलिभिजन र युट्युबहरुमा पुराना दल र नेताहरुका भ्रष्टाचारमा फाइलहरु पल्टाउँदै प्रश्न उठाउन थालेपछि उनलाई चिन्न थालेका थिए ।
हाम्रो नेपाल, हामी नेपाली अभियानका संयोजक हुँदा २०७६ मा उनले आयोजना गरेको पत्रकार सम्मेलनमा कोही पनि पत्रकारहरु उपस्थित भइदिएनन् । केही संख्यामा आएका पत्रकारका अघि पत्रकारलाई नै बिकाउको संज्ञा दिएपछि उनीविरुद्ध मुद्दा परेको थियो । प्रहरीले पक्राउ गरेर काठमाडौं ल्यायो । त्यस क्रममा उनीमाथि भौतिक आक्रमसमेत भयो । सोही बेला उनको चर्चा एकाएक देश विदेशमा चुलियो । अहिले हेर्दा ठूलो स्वरले बोल्छ भन्दै खिसिट्यूरी गर्नेहरु धेरै छन् । तर उनको राजनीतिक संघर्ष भने कमको छैन । कक्षा १० सम्मको अध्ययन उनले गाउँमै गरेका थिए । एसएसलीपछि उनी विज्ञान विषय पढ्न काठमाडौंको त्रिचन्द्र कलेज पुगे । त्यो सकेपछि उनी सीए पढ्न भारतको राजधानी दिल्ली पुगे । तर अध्ययन पूरा नगरीकनै फर्किएको भनिए पनि यसबारे उनले आधिकारिक रुपमा कतै उल्लेख गरेका छैनन् । तर भारतीयहरुले गर्ने हेपाहा व्यवहारकै कारण आफू त्यहाँ बस्न नसकेर नेपाल फर्किएको उनी बताउँथे । नेपाल फर्किएपछि उनले नेपालमा भ्रष्टाचार र कुशासनको विरोधमा देशभर अभियान चलाए ।
ठूलो स्वर अजंगको शरीरले पनि उनको व्यक्तित्व आक्रामक देखिन्छ । तर सुरुवाती अभियानका क्रममा उनीमाथि ज्यान मार्नेसम्मका प्रयास भए । क्यान्टोनमेन्ट भ्रष्टाचार र जनयुद्धमा बालबालिका प्रयोग लगायतका विषयमा प्रश्न उठाउन थालेपछि उनी तत्काली नेकपा माओवादी केन्द्रको तारोमा परेका थिए । एमालेले पनि उनलाई तारो बनाएकी थियो । २०७६ भदौ २९ मा पुल्चोक गरिरहँदा पत्रकारको भेषमा पुगेका एमालेका कार्यकर्ताहरुले उनीमाथि भौतिक आक्रमण गरे । उनका लागि विर्षन नसकिने र नेपाली राजनीतिमा झन् वेगका साथ उडान भर्ने माध्यम बन्यो चितवनको घटना । चितवनमा उनलाई माओवादी निकटका कार्यकर्ताहरुले कुटपिट गरी मर्यो भनेर गाडीमै छाडेका थिए । उनी भन्छन्, ‘धन्न बाँचे । मलाई त मर्यो भनेर छाडेका थिए । त्यस्ता आक्रमण हुन थालेपछि नै म सही रहेछु भन्ने लाग्यो । र त्यसपछि झन् प्रश्न गर्ने साहस बढ्दै गयो ।’
अघिल्लो निर्वाचन अघि मात्र उनी राप्रपामा प्रवेश गरेका थिए । राप्रपामा पनि उनको यात्रा वेगपूर्ण नै रह्यो । राप्रपाका प्रवक्ता बनेका उनी सदनमा प्रमुख सचेतकसम्म बने । केही जानकारहरु अघिल्लो चुनावमा शाहीकै चर्चाका कारण राप्रपाले समानुपातिकतर्फ ठूलो मत ल्याएर राष्ट्रिय पार्टी बन्न पुगेको हो । यसपटक पनि उनको उडान शानदारपूर्ण नै छ । तर सदनमा बलियो प्रतिपक्षीसमेत नरहेका बेला उनी कुन कित्तामा उभिन्छन् त्यो भने हेर्न बाँकी छ । प्रतिपक्षमा बसे भने बलियो सरकारलाई पनि उनका प्रश्नहरुको सामना गर्न सहज भने पक्कै हुनेछैन ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
