ढाका– बंगलादेशका नवनिर्वाचित प्रधानमन्त्री तारिक रहमानले आफ्नो सरकारको कार्यकाल सम्हालेलगत्तै १८० दिने विशेष प्राथमिकता योजना सार्वजनिक गरेका छन्।
मंगलबार पद तथा गोपनीयताको शपथ लिएका रहमानले परम्परागत १०० दिने कार्ययोजनालाई तोड्दै ६ महिनाको विस्तृत खाका अघि सारेका हुन्।
उनको योजनामा मुख्यगरी शान्ति सुरक्षा, महँगी नियन्त्रण, ऊर्जा आपूर्ति र सार्वजनिक यातायातमा सुधार गर्ने चारवटा खम्बालाई प्राथमिकतामा राखिएको छ। प्रधानमन्त्री रहमानले हरेक मन्त्रालयलाई आगामी १८० दिनभित्र आ-आफ्नो क्षेत्रको लक्ष्य निर्धारण गरी कार्यान्वयनमा लाग्न कडा निर्देशन दिएका छन्।
उनले अपराध उन्मूलन र भ्रष्टाचार नियन्त्रणलाई सरकारको प्रमुख एजेन्डा बनाउँदै जनतामा शान्ति र सुरक्षाको प्रत्याभूति गराउने उद्घोष गरे। मन्त्रीहरूले शपथ लिएसँगै सरकारको प्राथमिकता कार्यान्वयनमा सक्रियता देखाएका छन्। गृहमन्त्री सालाउद्दिन अहमदले अबका दिनमा देशमा भिडभाड वा हिंसात्मक गतिविधि हुन नदिने र लागुऔषध नियन्त्रणमा शून्य सहनशीलता अपनाउने प्रतिबद्धता जनाएका छन्।
विदेश नीतिका सम्बन्धमा विदेशमन्त्री कलिलुर रहमानले बंगलादेश पहिलो (बंगलादेश फस्ट) को अवधारणा अघि सारेका छन्। उनले स्वर्गीय राष्ट्रपति जियाउर रहमानको विदेश नीतिलाई अनुशरण गर्दै सबै राष्ट्रसँग मैत्रीपूर्ण सम्बन्ध राख्ने तर राष्ट्रिय हितलाई सर्वोपरी मान्ने स्पष्ट पारे।
प्रधानमन्त्री रहमानले पवित्र रमजानको अवसरमा शुभकामना दिँदै महँगी बढ्न नदिन र खाद्यान्नको मूल्य आम नागरिकको पहुँचमा राख्न व्यापारीहरूलाई सचेत गराएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
