काठमाडौँ– बङ्गलादेशको आम निर्वाचनमा बङ्गलादेश नेशनलिस्ट पार्टी (बीएनपी)ले बहुमत हासिल गरेको छ ।
कुल ३ सय सिटमध्ये हालसम्म बीएनपीले २०९ सिट जितेको स्थानीय सञ्चारमाध्यमले जनाएका छन् । यससँगै पूर्वप्रधानमन्त्री बेगम खालिदा जियाका छोरा एवम् बीएनपी अध्यक्ष तारिक रहमान प्रधानमन्त्री बन्ने निश्चित भएको छ ।
देशका १२ करोड ७० लाखभन्दा बढी मतदाताले बिहीबार मतदान गरेका थिए। निर्वाचनसँगै देशको भविष्य र संवैधानिक सुधारका लागि ‘जुलाई राष्ट्रिय बडापत्र’ सम्बन्धी जनमत संग्रह पनि एकैसाथ आयोजना गरिएको थियो ।
चुनावी प्रतिस्पर्धा र मुख्य खेलाडीहरू यस पटकको निर्वाचनमा ५१ वटा राजनीतिक दलका १ हजार ९८१ उम्मेदवारहरू चुनावी मैदानमा थिए ।
लामो समय सत्तामा रहेको शेख हसिनाको अवामी लिगलाई निर्वाचन आयोगले प्रतिबन्ध लगाएका कारण यस पटक चुनावी मैदानमा उनीहरूको उपस्थिति रहेको थिएन ।
तारिक रहमान करीब १७ वर्षसम्म लण्डनमा राजनीतिक शरण लिएर बसेका थिए। उनी सन् २००७ मा भ्रष्टाचारको आरोपमा पक्राउ परेका थिए भने १८ महिना जेलमा बसेपछि उपचारका लागि भन्दै लण्डन गएर उतै बसेका थिए। गत डिसेम्बर २६ मा मात्र उनी ढाका फर्किएका हुन्।
स्वदेश फर्किएको केही दिनमै उनकी आमा तथा पूर्व प्रधानमन्त्री खालिदा जियाको निधन भएको थियो । जसपश्चात् तारिकले पार्टीको पूर्ण नेतृत्व सम्हालेका छन्। जनवरी ९ मा उनलाई औपचारिक रूपमा बीएनपीको अध्यक्ष चुनिएको थियो।
बंगलादेशका पूर्व राष्ट्रपति जियाउर रहमान र पूर्व प्रधानमन्त्री खालिदा जियाका जेठा छोरा तारिकको जन्म २० नोभेम्बर १९६५ मा भएको थियो। उनको राजनीतिक यात्रा सन् १९८८ बाट सुरु भएको भए पनि २००१ को निर्वाचनपछि उनी पार्टीमा शक्तिशाली नेताका रूपमा उदाएका थिए। उनको नेतृत्वमा अहिले बीएनपीले दर्जनौँ र्याली र चुनावी अभियानहरू सञ्चालन गरेको छ।
तारिक रहमानको राजनीतिक जीवन विवादमुक्त भने छैन। २००१ देखि २००६ सम्म बीएनपीको शासनकालमा उनी र उनका निकटवर्तीहरूमाथि हावा भवन मार्फत समानान्तर सत्ता चलाएको र व्यापक भ्रष्टाचार गरेको आरोप लागेको थियो। सन् २००४ मा शेख हसिनाको र्यालीमा भएको ग्रेनेड हमलामा पनि उनलाई दोषी ठहर गर्दै आजीवन कारावासको सजाय सुनाइएको थियो।
यद्यपि, अवामी लिग सरकारको पतनपछि उनीमाथि लागेका धेरैजसो मुद्दाहरू खारेज भएका छन् र बीएनपीले यी सबै आरोपहरूलाई राजनीतिक प्रतिशोध मात्र भएको बताउँदै आएको छ।
अवामी लिग चुनावमा नभएको अवस्थामा बीएनपीका लागि बाटो सहज देखिए पनि अब उसको मुख्य प्रतिस्पर्धीका रूपमा कट्टरपन्थी मानिने जमात-ए-इस्लामी उदाएको छ। राजनीतिक विश्लेषकहरूका अनुसार तारिक रहमानले प्रतिकूल परिस्थितिमा पनि पार्टीलाई एकजुट राख्न सफल भएका छन्।
अब बंगलादेशको सम्भावित प्रधानमन्त्रीका रूपमा उनले जनताको विश्वास जित्ने र देशमा लोकतान्त्रिक स्थिरता कायम गर्ने ठूलो चुनौतीको सामना गर्नुपर्नेछ।
तारिक रहमानको यो पुनरागमनलाई धेरैले 'खरानीबाट पुनः उठेर उभिएको' नेतृत्वको रूपमा हेरेका छन्। अब बंगलादेशको नयाँ सत्ता सम्हाल्ने जिम्मेवारी उनको काँधमा आउने निश्चित जस्तै देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
