एजेन्सी– फ्रान्सका वित्तीय अपराध अभियोजकहरूले पूर्व संस्कृतिमन्त्री ज्याक लाङमाथि कर छलीबाट प्राप्त रकम शुद्धीकरण गरेको आशङ्कामा प्रारम्भिक अनुसन्धान सुरु गरेका छन्।
अमेरिकी यौन अपराधी जेफ्री एप्स्टिनसँगको सम्बन्धबारे खुलासा भएपछि यो छानबिन सुरु भएको हो। ८६ वर्षीय लाङले आधारहीन भन्दै आरोप अस्वीकार गरेका छन्। अनुसन्धानले आफ्नो इमानदारी स्पष्ट गर्ने उनको भनाइ छ।
अनुसन्धान घोषणा भएको केही घण्टापछि लाङले फ्रान्स–अरब सम्बन्ध प्रवर्द्धन गर्ने संस्था ‘अरब विश्व संस्थान’को प्रमुख पदबाट राजीनामा दिने घोषणा गरेका छन्। विदेशमन्त्री जाँ–नोएल बारोले उक्त प्रस्ताव स्वीकार गर्दै उत्तराधिकारी खोज प्रक्रिया सुरु गर्ने बताएका छन्।
एपिस्टन फाइलमा लाङको नाम करिब ७०० पटक उल्लेख भएको छ। उनका छोरी क्यारोलिन लाङ पनि अनुसन्धानको दायरामा छिन। उनले फ्रान्सेली फिल्म निर्माता संघको नेतृत्वबाट राजीनामा दिइसकेकी छिन्।
आफूले करिब १५ वर्षअघि एपिस्टनलाई भेट्दा उनका अपराधबारे आफूलाई केही थाहा नभएको लाङले बताएका छन्। एपिस्टनलाई आफूले कला र संस्कृतिमा रुचि राख्ने व्यक्ति ठानेको दाबी उनले गरेका छन्। फ्रान्सेली सञ्चारमाध्यमले भने एपिस्टनको कार र निजी विमान प्रयोग गरेकोलगायत विवरण सार्वजनिक गरेका छन्।
फाइलहरूले लाङ वा उनकी छोरीलाई एपिस्टनका यौन अपराधमा जोडेको छैन। तर दुई पक्षबिच आर्थिक सम्बन्धमाथि प्रश्न उठेको छ। एप्स्टिनले २०१९ मा न्यूयोर्कको जेलमा आत्महत्या गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
