काठमाडौं– अन्तर्राष्ट्रिय क्रिकेट काउन्सिल (आइसिसी) ले जिम्बावेमा हुने एकदिवसीय विश्वकप छनोट प्रतियोगिताको मिति सार्वजनिक गरेको छ।
१० टिमबीच हुने छनोट प्रतियोगिता यसअघि बंगलादेशमा हुने तय थियो । तर, बंगलादेश सीधै छनोट भएपछि प्रतियोगिता जिम्बावेमा गर्ने निर्णय गरिएको थियो । शुक्रबार बसेको आइसिसीको बैठकले मार्चमा छनोट प्रतियोगिता गर्ने निर्णय गरेको हो।
१० टिमबीच हुने प्रतियोगिताबाट २ टिम सन् २०१९ को एकदिवसीय विश्वकपमा छानिनेछन् । छनोट प्रतियोगितामा आयोजक जिम्बावेसहित वेस्ट इन्डिज, अफगानिस्तान र आयरल्यान्ड गरी टेस्ट मान्यता चार राष्ट्रले खेल्नेछन् । एकदिवसीय विश्वकप छनोटमा विश्व क्रिकेट लिग (डब्लुसिएल) च्याम्पियनसिपबाट ४ टिम तथा डिभिजन–२ बाट २ टिम छानिनेछन्।
डब्लुसिएलमा शीर्ष चारमा रहेर एकदिवसीय विश्वकप छनोट खेल्ने नेपालको लक्ष्य संकटमा परेको छ । नेपालले बाँकी तीनै खेल जिते मात्र चौथो स्थानमा रहेर छनोट हुने सम्भावना रहनेछ । तर, यसका लागि हङकङ र केन्याले बाँकी सबै खेल हार्नुपर्ने हुन्छ।
डब्लुसिएल च्याम्पियनसिपबाट अहिलेसम्म नेदल्यान्ड्स र पपुवा न्युगिनी छनोट भइसकेका छन् । अब स्कटल्यान्ड, हङकङ, केन्या र नेपालमध्ये २ टिम छानिनेछन् । यसमा स्कटल्यान्ड र हङकङको सम्भावना बढी छ।
विश्वकप छनोटको पहिलो विकल्प लगभग सकिएको अवस्थामा रहेको नेपालसँग दोस्रो विकल्प बाँकी छ । डब्लुसिएल च्याम्पियनसिपमा शीर्ष चारमा पर्न नसके नेपाल डिभिजन–२ मा झर्नेछ । डिभिजन–२ मार्फत नेपाललाई विश्वकप खेल्ने मौका छ । डब्लुसिएल च्याम्पियनसिप सकिएको एक महिनापछि डिभिजन–२ प्रतियोगिता हुनेछ । नामिबियामा हुने डिभिजन–२ मा ६ टिमबीच प्रतिस्पर्धा हुनेछ । सो प्रतियोगिताका शीर्ष २ टिम विश्वकप छनोटका लागि छानिनेछन्।
नामिबियामा डिभिजन–२ सकिएको एक महिनापछि जिम्बावेमा विश्वकप छनोट प्रतियोगिता हुनेछ । डिभिजन–२ मा युएई, नामिबिया, क्यानडा र ओमान तथा बाँकी २ टिमबीच प्रतिस्पर्धा हुनेछ । स्कटल्यान्ड, हङकङ, केन्या र नेपालमध्ये २ टिम डिभिजन–२ मा झर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
