काठमाडौँ– जेनजी प्रदर्शनसँगै बिथोलिएको शान्ति सुरक्षा सामान्य अवस्थामा फर्किएको गृहमन्त्री ओमप्रकाश अर्यालले दाबी गरेका छन्।
बिहीबार राष्ट्रियसभाको सङ्घीयता सबलीकरण तथा राष्ट्रिय सरोकार समितिमामा बोल्दै अर्यालले भने, ‘करिब २ महिनाको अवधिमा हामीले शान्ति सुरक्षालाई सामान्य अवस्थामा ल्याउन सफल भएका छौँ।’
जेनजी युवाहरू समेतको सहभागितामा गृह मन्त्रालयमा सहायता कक्षको स्थापना गरेर सुरक्षा जोखिम भएका व्यक्तिहरूलाई सहजीकरण गरिएको उनले बताए।
वर्तमान सरकार गठन हुँदा अन्योलको अवस्था रहेको उल्लेख गर्दै उनले भने, ‘फेरि पनि यस्तै रक्तपातपूर्ण अवस्था आउँछ कि भन्ने त्रास थियो, हामी त्यस्तो अवस्था आउन नदिनेतर्फ लाग्यौँ।’
आन्दोलनमा क्षति पुगेको नेपाल प्रहरीको ४६५ युनिटहरु मध्ये ४४८ वटा सञ्चालनमा आइसकेका उनले बताए। उनले भने, ‘त्यस्तै क्षति पुगेका १० जिल्ला प्रशासन कार्यालय र ४ वटा इलाका प्रशासन कार्यालयहरूको सेवालाई सुचारु गरिएको छ।’
प्रदर्शनमा उच्छृङ्खल गतिविधिमा संलग्न ४२९ जनालाई पक्राउ गरेर विभिन्न मुद्दा शीर्षकमा १६८ वटा मुद्दा दर्ता गरिएको अर्यालले बताए। उनले भने, ‘देशका विभिन्न कारागारबाट १४ हजार ५५४ कैदीबन्दीहरु फरार भएकोमा अहिलेसम्म ९ हजार ५४१ जना फिर्ता ल्याइसकिएको छ।’ मन्त्री अर्यालका अनुसार ५ हजार १३ जना कैदीबन्दी फिर्ता आउन बाँकी छन्।
त्यस्तै अर्यालले विदेशमा रहेका नेपालीलाई मताधिकार दिन कानुन संशोधन गर्न लागिएको बताए।
‘हामी विदेशमा रहेका नेपालीलाई मताधिकार दिनेबारे कानुन संशोधन प्रक्रिया अगाडि बढाएका छौं,’ गृहमन्त्री अर्यालले भने ।
प्राविधिक रूपमा कसरी काम गर्ने भनेर नीति अनुसन्धान प्रतिष्ठानले काम गरिरहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765976170.png)
-1764146706.png)
.jpg)
-1763721444.png)
