काठमाडौं– नेपाली कम्युनिस्ट पार्टीका सहसंयोजक माधवकुमार नेपालले आफूहरूको एकताका कारण केहीको सातो गएको टिप्पणी गरेका छन्।
बुधबार नेपाली कम्युनिष्ट पार्टीमा मातृभूमि जागरण अभियान समाहित कार्यक्रमलाई सम्बोधन गर्दै उनले यस्तो टिप्पणी गरेका हुन्।
आफूहरूको एकता अभियानले ओलीको होस हवास उडेको टिप्पणी गर्दै गालीगलौजमा उत्रिन आवश्यक नरहेको बताए। आफूहरूलाई धन्यवाद दिन प्रश्ताव पारित गरे घाउमा मल्हम लाग्ने उनको भनाइ छ।
‘एकताको प्रक्रिया अघि बढिरहेको छ। एकताको यो अभियान अघि बढिरहेको छ। एकताको यो अभियानले नेपालको राजनीतिमा नयाँ तरंग पैदा गरेको छ। कम्युनिस्ट आन्दोलनका कतिपय घटकहरूको सातो गएको हुनुपर्छ,’ अध्यक्ष नेपालले भने, ‘होस् हवास गुमेको हुनुपर्छ। होस् गुमाउनु आवश्यक छैन। गाली गलौजमा उत्रिनुपर्ने आवश्यकता छैन। बरु हामीलाई धन्यवाद दिनुहोस्। मैले त बिगारेँ, तपाईंहरूले सपार्दै हुनुहुन्छ भनेर। धन्यवाद प्रश्ताव पास गर्नुस्। धन्यवाद प्रश्ताव पास गर्नुभयो भने हाम्रो घाउमा मल्हमको काम गर्नेछ।’
नेपालले पार्टी एकता गर्न सजिलो भए पनि पार्टीलाई बलियो बनाउन कठिन रहेको बताए।
‘एकता गर्न सजिलो छ तर यसलाई बलियो बनाउनका लागि धेरै कुरामा विचार पुर्याउनुपर्ने आवश्यकता पर्छ’, नेता नेपालले भने– ‘२०७५ साल जेठ ३ गते दुई वटा पार्टी मिलेर नेकपा गठन गरिएको थियो। दुई पार्टी मिल्ने निश्चित भएपछि २०७४ को चुनावमा झन्डै दुई तिहाइ मत जनताले दिएका थिए त्यो सङ्केत कम्युनिस्ट एकै ठाउँ बसुन् भन्ने हो।’
नेता नेपालले नेपाली कम्युनिस्ट पार्टी गठन हुँदै गर्दा केही कम्युनिस्ट पार्टीका नेतालाई चिन्ता परेको भन्दै नवगठित पार्टीका नेतारुले विगतका गल्ती कमजोरी सच्चाउँदै नयाँ क्रान्तिकारी आचरण बोकेको पार्टी निर्माण अभियानमा जुटेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-ink-1735720380-1735720728.jpeg)
