जनकपुर– बिहारको विधानसभाको दोस्रो तथा अन्तिम चरणको मतदान आज हुँदैछ।
नेपालसँग सीमा जोडिएका जिल्लासहित २० जिल्लाका १२२ विधानसभा निर्वाचन क्षेत्रमा मतदान सुरु भएको छ। निर्वाचनमा एक हजार ३०२ उम्मेदवारले प्रतिस्पर्धा गरिरहेका छन्।
बिहारको विधानसभा निर्वाचनका लागि नेपालसँग जोडिएका नाकाहरु बन्द गरिएका छन्। महोत्तरी, रौतहट, धनुषा, मोरङ, सुनसरीको सीमा नाका शनिबार बेलुकादेखि बन्द गरिएको हो। आजको मतदानपछि सीमा नाका खुला हुने जिल्ला प्रशासन कार्यालयहरुले जानकारी दिएको छ।
यता नेपाल–भारत सीमानाका बन्द भएपछि बिजलपुर–कुर्था–जनकपुरधाम–जयनगर रेल सेवा समेत बन्द हुने भएको छ। नेपाल रेल्वे कम्पनी लिमिटेडले सीमानाका बन्द भएकाले भारतको जयनगरसम्म पुग्ने रेल सेवा बन्द छ। सीमानाका खुलेपछि पुनः सेवा सुचारु हुनेछ।
१२२ क्षेत्रमा एक करोड ७४ लाख महिलासहित तीन करोड ७० लाखभन्दा बढी मतदाता छन्। मतदानका लागि ४५ हजार ३९९ मतदान केन्द्र निर्धारण गरिएको छ।
नोभेम्बर ६ मा १८ जिल्लाका १२१ निर्वाचन क्षेत्रमा पहिलो चरणको मतदान भएको थियो। मतदानमा ६५.०८ प्रतिशतले मतदान गरेका थिए।
अन्तिम चरणको मतदानले नयाँ सरकार गठनसँगै बिहारको राजनीतिक भविष्य निर्धारण गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
