काठमाडौँ– नवगठित नेपाली कम्युनिस्ट पार्टीका सहसंयोजक माधवकुमार नेपालले विभिन्न राजनीतिक पार्टीहरु मिलेर बनेको नयाँ पार्टी र नेताहरूको अग्निपरीक्षा सुरु भएको बताएका छन्।
बुधबार भएको एकता सभा तथा राष्ट्रिय सम्मेलनलाई सम्बोधन गर्दै सहसंयोजक नेपालले यस्तो बताएका हुन्।
‘हाम्रो अग्निपरीक्षा अब सुरु हुँदै छ। जनताले हामीलाई नियालिरहेका छन्’, नेपालले भने, ‘यो पुरानै पार्टीको रूप होइन, पुराना हाम्रा पार्टीमा रहेका कमी कमजोरीबाट मुक्त भएर, समीक्षा गरेर, सुधारेर, नयाँपन दिएर, देश भक्तिको नमुना बनेर, परिवर्तनको संवाहक भएर क्रान्तिकारी चरित्र बोकेका योद्धाहरूको पार्टी हामीले बनाएका छौ भनेर जनतामा विश्वास दिनुपर्ने आवश्यकता छ।’
त्यस्तै उनले आजै मात्र एकीकृत समाजवादीको केन्द्रीय कार्यालयमा जेनजी युवाहरूलाई पार्टीमा प्रवेश गराएको उल्लेख गर्दै उनले अरुलाई पनि पार्टीमा आउन भने।
‘आजमात्रै जेनजी पुस्ताका वार्तामा रहेकाहरूमध्ये युवाहरूलाई पार्टीमा प्रवेश गराएका छौं। अरु जेनजी साथीहरूलाई पनि भन्न चाहन्छु, आउनुस्, हामीसँग हातेमालो गर्दै अघि बढ्नुस्,’ उनले भने।
सुशासनको पक्षमा, भ्रष्टाचारको अन्त्य, समाजवादको दिशामा अघि बढ्नका लागि हातमा हात मिलाएर अघि बढ्न उनले आग्रह गरेका हुन्।
‘सुशासनको पक्षमा होस् वा भ्रष्टाचार नियन्त्रणको हुरा होस्। समाजवादको दिशामा अघि बढ्ने कुरा होस्। समाजमा रहेका विकृति विसंगतिका विरुद्धमा जुध्ने कुरा होस्। यी सबै कुरामा तपाईंहरूसँग हामी हातमा हात मिलाएर अघि बढ्न चाहन्छौं,’ अध्यक्ष नेपालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
