एजेन्सी- अमेरिकाले कोलम्बियाका वामपन्थी राष्ट्रपति गुस्तावो पेट्रोमाथि प्रतिबन्ध लगाएको छ।
लागुऔषध तस्करी नियन्त्रण गर्न असफल भएको आरोप लगाउँदै अमेरिकाले पेट्रोमाथि प्रतिबन्ध लगाएको हो।
‘राष्ट्रपति पेट्रोले लागुऔषध कार्टेलहरूलाई फस्टाउन दिए र यो गतिविधि रोक्न अस्वीकार गरे’, अमेरिकी ट्रेजरी सचिव स्कट बेसेन्टले एक विज्ञप्ति जारी गर्दै भने, ‘पूर्व छापामार नेता पेट्रो सत्तामा आएदेखि कोलम्बियामा कोकिन उत्पादन ‘दशकौंको उच्च दरमा बढेको छ, जसले संयुक्त राज्य अमेरिकालाई डुबाउँदै र अमेरिकीहरूलाई विष खुवाइरहेको छ।’ उनले ट्रम्प प्रशासनले ‘कडा कदम’ चालिरहेको र अमेरिकामा लागुऔषध तस्करी ‘सहन नगर्ने’ बताए।
यसैगरी कोलम्बियाका आन्तरिक मामिला मन्त्री आर्मान्डो बेनेडेट्टीका साथै राष्ट्रपति पेट्रोकी पत्नी र जेठा छोरामाथि पनि प्रतिबन्ध लगाइएको छ। यस अन्तर्गत उनीहरूले अमेरिकामार्फत सम्पत्ति वा पहुँच राख्न पाउने छैनन्।
कोलम्बिया कुनै समय वासिङ्टनको लागु औषधविरुद्धको युद्धमा एक नजिकको सहयोगी थियो। यसवापत वार्षिक रूपमा करोडौँ डलर सैन्य सहायता पाउँथ्यो। तर, ट्रम्प सत्तामा फर्किएपछि पेट्रो र उनको प्रशासनसँग अमेरिकाको बारम्बार मनमुटाव भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
