काठमाडौं– जेन–जीको प्रदर्शन तनावपूर्ण बन्दै गएपछि सरकारका मन्त्रीहरुले धमाधम राजीनामा दिन थालेका छन् । मंगलबार बिहान कृषिमन्त्री रामनाथ अधिकारीले राजीनामा दिएकोमा अहिले खानेपानी मन्त्री प्रदीप यादव र खेलकुदमन्त्री तुजुलाल चौधरीले राजीनामा दिएका छन् ।
जेनजीहरूको प्रदर्शनका क्रममा सोमबार १९ जना युवाले ज्यान गुमाएको घटनापछि सरकारमा बस्न उपयुक्त नहुने भन्दै मन्त्री यादवले राजीनामा दिएको उनको स्वकीय सचिवालयले जनाएको छ।
'हिजो जेनजी युवा पुस्ताले गरेको आन्दोलनको समर्थन र सरकार र प्रशासनद्वारा गरिएको दमनको विरोध गर्दै म आफ्नो खानेपानी मन्त्रालयको मन्त्री पदबाट राजिनामा दिने घोषणा गर्दछु' मन्त्री यादवले सामाजिक सञ्जालमार्फत जानकारी दिएका छन्।
'प्रिय युवा भाइ बहिनीहरू तपाईँ नै मेरो प्रथम सहयोगी र मेरो जोश र ऊर्जाका सूत्रधार हुनुहुन्छ। हामी सबैलाई संयमता अपनाई युवा पुस्तालाई सही मार्ग दर्शन दिन र सहयोग गर्न अपिल गर्दछु,' उनले भनेका छन्।
यस्तै कांग्रेसमा शेखर कोइरालाको कोटामा मन्त्री भएका चौधरीले पनि शेखरको निर्देशनपछि पदबाट राजीनामा दिएका छन् । स्वास्थ्य तथा जनसख्या मन्त्री प्रदिप पौडेलले पनि राजिनामा दिने घोषणा गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
