काठमाडौँ– काठमाडौँ महानगरपालिकाका मेयर बालेन्द्र महानगर प्रहरीको काम सिनेमा हेरेजस्तो लाग्ने गरेको बताएका छन्।
३३ औँ महानगर प्रहरी दिवसको अवसरमा शनिवार काठमाडौँमा आयोजित कार्यक्रममा उनले यस्तो बताएका हुन्।
उनले सानोमा आफूले हलिउड फिल्म हेर्दाखेरि सिटी पुलिसले गरेको जस्तो काम अहिले काठमाडौँ महानगर प्रहरीले गरिरहेको बताए।
फिल्ममा देखाइएको काम रियलमा हुनु खुसीको कुरा भएको उनले बताए। उनले काठमाडौँ महानगरबाट धेरै पालिकाहरूले काम गर्ने शैली सिक्न खोजेको पनि बताए। त्यसमा महानगर प्रहरीको ठुलो योगदान रहेको उनको भनाई छ। काठमाडौँ महानगरपलिका भित्रका सार्वजनिक सम्पत्तिको संरक्षण गर्ने, अतिक्रमण हटाउने, महानगरपालिकामा सुशासन, सुव्यवस्था, अनुगमन गर्ने कामहरूमा नगरप्रहरीको महत्त्वपूर्ण भूमिका रहेको उनले बताए।
उनले भने ‘धेरै पालिकाहरू छन्, धेरै ठाउँहरू छन्। काठमाडौँ महानगरपालिकाबाट केही सिक्न चाहन्छन्। जुन ठाउँहरूले काठमाडौँ महानगरपालिकाबाट केही सिक्न खोज्नुहुन्छ, त्यो सिकाइमा तपाईँहरूको ठुलो योगदान छ। सार्वजनिक सम्पत्ति संरक्षण, अतिक्रमण हटाउनेदेखि लिएर काठमाडौँ महानगरपालिकामा सुशासन, सुव्यवस्था, अनुगमन गर्ने कामहरूमा तपाईँहरूको उल्लेखनीय योगदान रहेको छ। सानोमा हुँदा रमाइलो याद आउँछ, हामी हलिउड फिल्महरू हेर्थ्यौँ, पुराना पुराना फिल्महरू हेर्दाखेरि त्यसमा न्युवर्क सिटि पुलिकको काम कारबाही हेर्दाखेरि लाग्थ्यो काठमाडौँ लगायत देशका विभिन्न पालिकाहरूमा सिटि पुलिस कस्तो हुनुपर्छ भन्ने कुराहरू सिनेमामा मात्रै हेर्न पाइन्थ्यो पहिला। र अचेल चाहिँ तपाईँहरूको काम हेर्दाखेरि कहिलेकाहीँ सिनेमा हेरेजस्तो पनि लाग्छ। त्यो चाहिँ खुसीको कुरा हो। काठमाडौँ महानगरपालिकालाई जसरी एउटा राजधानीको रूपमा चिनिन्छ, महानगर प्रहरी बल पनि काठमाडौँको एउटा पर्यायवाची पहिचानको रूपमा स्थापित भएको छ। तपाईँहरूले देखाउनुभएको कर्मनिष्ठ, योगदानहरू अहिलेको बितेको ३ वर्षमा मात्रै नभएर आगामी दिनहरूमा पनि विभिन्न सिटि पुलिस तथा स्थानीय सरकारहरूलाई एउटा सिकाईको रूपमा रहनेछ।’
उनले महानगरप्रहरी आगामी दिनमा पनि अन्य सिटी प्रहरी र स्थानीय तहका सरकारहरूको लागि सिकाईको रूपमा रहने विश्वास व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
