काठमाडौं– नेकपा माओवादी केन्द्रको स्थगित मध्यपहाडी लोकमार्ग केन्द्रित अभियान फेरि सुरु हुने भएको छ।
साउन १६–१९ गतेसम्म बसेको पार्टीको स्थायी समिति बैठकको निर्णय अनुसार भदौ २२ गते लमजुङबाट अभियान सुरु गर्न लागिएको महासचिव देव गुरुङले बताएका हुन्।
गुरुङले बुधबार पठाएको सर्कुलर अनुसार अभियानमा भाग लिन अध्यक्ष पुष्पकमल दाहाल प्रचण्ड नेतृत्वको टोली भदौ २१ गते लमजुङमा बास बस्नेछन्।२२ गते लमजुङ खण्डमा कार्यक्रम आयोजना गर्ने र बेलुका गोरखा बास बस्ने, २३ गते गोरखा खण्डमा कार्यक्रम आयोजना गर्ने र बेलुका धादिङ बास बस्ने गर्ने तय भएको छ।
यस्तै, भदौ २४ गते धादिङ खण्डमा कार्यक्रम आयोजना गर्ने र बेलुका नुवाकोट बास बस्ने र २५ गते दिनभर नुवाकोट खण्डमा कार्यक्रम आयोजना गर्ने र बेलुका काठमाडौं फर्कने तय भएको उनले बताए। उनका अनुसार बाँकी जिल्लाहरूको कार्यक्रम पछि तय गरिनेछ।
यस पटक अध्यक्ष प्रचण्डले नेतृत्व गर्ने टोलीमा वरिष्ठ उपाध्यक्ष, उपाध्यक्षहरू र महासचिव मात्रै रहने उल्लेख छ।
यसअघि माओवादीले अभियानमा उपमहासचिव तहसम्मका पदाधिकारीलाई अभियानमा समेटेको थिए। तर, अहिले प्रचण्ड र उपमहासचिव जनार्दन शर्माबीच खटपट चलिरहेको बेलामा अभियानमा महासचिवसम्म मात्रै सहभागी हुन सर्कुलर गरिएको छ।
माओवादीले तराई मधेस जागरण अभियानपछि मध्यपहाडी लोकमार्ग केन्द्रित अभियान थालेको थियो। अहिले वर्षाको कारणले केही समय रोकेर फेरि सुरु गर्न लागेको हो।
माओवादीको पहिलो चरणको अभियान फागुन १२ गतेदेखि झापाको सबैभन्दा होचो स्थान कचनकवलबाट सुरु भएर वैशाख १७ गते कञ्चनपुरको महेन्द्रनगर पुगेर सम्पन्न भएको थियो।
यसैगरी दोस्रो चरणको मध्यपहाडी लोकमार्ग केन्द्रित अभियान जेठ २ गते बैतडीको पाटनबाट सुरु भएर जेठ १० गते पोखरा आएर स्थगित भएको थियो। जेठ १६ गते बसेको माओवादीको पदाधिकारी बैठकले जेठ २१ देखि २५ गतेसम्म पुनः सुचारु गर्ने निर्णय गरेको थियो। तर मौसमी प्रतिकुलताका कारण देखाउँदै स्थगित गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
