काठमाडौँ– नेकपा एमालेका सांसद योगेश भट्टराईले आचरण विपरीतको काम गर्नेलाई हटाउन खोज्दा जनजाति महिलालाई हटाउन खोज्यो भन्दै ‘इमोसनल ब्ल्याकमेल’ गर्न आवश्यक नभएको बताएका छन्।
प्रतिनिधिसभाको बिहीबारको बैठकमा विशेष समयमा बोल्दै सांसद भट्टराईले उपसभामुख इन्दिरा राना मगरको विषय कोट्याउँदै आचरणमाथि प्रश्न उठेपछि स्पष्ट हुनुपर्ने बताएका हुन्।
उनले उपसभामुखलाई हटाउन खोज्ने विषय संवैधानिक परिषद्को सङ्ख्यामा जोड्न आवश्यक नभएको बताए।
उनले भने, ‘उहाँले पत्र लेखेको विषय सदनलाई जानकारी नै छ। जिम्मेवार पदमा बसेको मान्छेले दूतावासमा पत्र लेख्न हुन्छ कि हुँदैन भन्ने कुरा सामान्य जानकारी राख्नुपर्ने हो। उहाँ संसद्को गरिमासँग जोडिएको व्यक्ति हो।’
जनजाति महिला भन्दै ‘इमोसनल ब्याकमेल’ गर्न आवश्यक नभएको भन्दै राना हटेर दलित महिला, मधेसी महिला र अन्य जनजाति महिला आउन सक्ने भट्टराईले बताए। उनले प्रश्न गर्दै भने, ‘जनजातिको कुरा गर्ने माननीयहरूले सुवास नेम्वाङलाई राष्ट्रपतिमा मत राख्नुभएन। अष्टलक्ष्मी शाक्यलाई उपराष्ट्रपतिमा मत हाल्नुभएन।’
त्यस्तै उनले उपसभामुखको विषयमा शिफल बाल सङ्गठनको सुधार गृहबाट ५ जना बच्चा हराएको विषयलाई पनि जोडे।
उनले थपे, हराएका बच्चाहरूको खोजी हुँदा २०७२ साल माघ १८ गते सो कार्यालयका एक कर्मचारीले केन्द्रीय बाल कल्याण परिषद्मा गएर एउटा बयान दिन्छन्। ती बच्चाहरू पिए नेपालका मानिसहरूले जबरजस्ती लिएर गएका छन्। त्यसको कार्यकारी प्रमुख हुनुहुन्थ्यो अहिलेको हाम्रो उपसभामुखज्यू।
उनले अवैध रूपमा बालबालिका ओसारपसारमा संलग्नहरूको अध्ययन गर्नको लागि तत्कालीन सरकारले पाटन उच्च अदालतका न्यायाधीशको नेतृत्वमा जाँचबुझ आयोग बनाएको स्मरण गरे। आयोगले बुझाएको प्रतिवेदन अझै सार्वजनिक नभएको भन्दै त्यसमा पिए नेपाल पनि संलग्न रहेको चर्चा रहेको बताए।
उनले प्रतिवेदनमा पिए नेपालमाथि पनि सङ्गठित अपराधमा अनुसन्धान गरी कारबाही गर्न सिफारिस भएको उल्लेख रहेको भन्दै तत्काल प्रतिवेदन सार्वजनिक गर्न सरकारसँग माग गरे। उनले राना उपसभामुख भएपछि मात्रै त्यो संस्थाबाट अलग भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
