काठमाडौं– उपसभामुख इन्दिरा रानालाई हटाउन सत्तारुढ नेकपा एमालेको संसदीय दलमा हस्ताक्षर थालिएको छ।
आफ्ना सांसदहरूलाई आकस्मिक रूपमा बोलाएको एमालेले सिंहदरबारस्थित संसदीय दलको कार्यालयमा धमाधम हस्ताक्षर गराएको हो।
कांग्रेसको पदाधिकारीको बैठक बसिरहेको छ। यो बैठकपछि सांसदहरुलाई सिंहदरबारस्थित दलको कार्यालयमा सांसदहरू आउन थालेका छन्।
एमालेका एक सांसदका अनुसार दुई बजेसम्म हस्ताक्षर गर्नेगरी सांसदहरूलाई खबर गरिएको छ। एमाले प्रमुख सचेतक महेश बर्ताैलाको कार्यकक्षमा हस्ताक्षर संकलन भइरहेको छ। एमाले सांसदहरू हस्ताक्षर गर्दै बर्ताैलाको कार्यकक्षबाट बाहिरिरहेका छन्।
यधपि विपक्षी दल राष्ट्रिय स्वतन्त्र पार्टी(रास्वपा)ले सचेततापूर्वक विरोध गर्ने तयारी गरेको छ।
यतिखेर उपसभामुख भने अमेरिकामा रहेको बुझिएको छ।संसद सचिवालय स्रोतका अनुसार साउन ३० गते उनी अमेरिकातर्फ गएकी हुन्। उनको १० दिने व्यक्तिगत भ्रमण रहेको बताइएको छ।
उपसभामुखलाई हटाइने चर्चाले उनको मातृ पार्टी रास्वपा तरंगित भएको छ। पार्टीका शीर्ष नेताहरू अनौपचारिक छलफलमा जुटेका छन्। औपचारिक बैठक भने अहिलेसम्म डाकिएको छैन। एक शीर्ष नेताले मिडियाबाट खबर थाहा पाएपछि आफूहरू पार्टी कार्यालयमा अनौपचारिक कुराकानी गरिरहेको बताए।
कांग्रेस र एमालेका नेताहरूबीच सोमबार साँझ बालुवाटारमा बैठक बसेको थियो।
महान्यायाधिवक्ता रमेश बडालसहित उनीहरूले छलफल गरेका थिए। उक्त छलफलमा सामाजिक सञ्जाल नियमन गर्नेबारे सर्वोच्च अदालतको फैसलाको मात्र होइन उपसभामुखको हटाउनेबारे पनि छलफल भएको थियो। त्यही छलफलपछि मंगलबार नै त्यो प्रक्रिया अघि बढाउन दलहरु लागेका हुन्।
उपसभामुख रानामाथि अमेरिका लैजाने प्रयोगका लागि भिसा जारी गर्नका लागि अमेरिकी राजदूतावासमा आफ्नो लेटरप्याडबाट चिठ्ठी पठाएको अभियोग छ। यसअघि पनि रानामाथि हटाउने तयारी भएको थियो। तर विरोध भएका कारण यो प्रक्रिया अघि बढेको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
