काठमाडौं– रक्षामन्त्री मानवीर राईले काठमाडौँ तराई/मधेस द्रूतमार्ग आयोजनाको काम तीव्र रुपमा अघि बढिरहको जानकारी दिएका छन् ।
सिंहदरबारमा बिहीबार बसेको राष्ट्रियसभा अन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा मन्त्री राईले निर्धारित समयमै द्रूतमार्ग आयोजना सम्पन्न गर्ने उद्देश्यका साथ सेनाले तराई/मधेस द्रूतमार्ग आयोजनाको काम तीव्र रुपमा गरिरहेको जानकारी दिएका हुन् ।
उनले निर्धारित मितिमा आयोजना सम्पन्न हुन नसके पनि अन्य आयोजना जस्तो धेरै ढिलाई नहुने बताए । मन्त्री राईले आयोजना अन्तर्गत खोकना क्षेत्रको जग्गा प्राप्तिमा केही समस्या अझै पनि रहेको उल्लेख गरे । स्थानीयवासीको भावनाअनुसार खोकना क्षेत्रको जग्गा प्राप्तिमा प्रक्रियाअघि बढानेमा सरकार र सेना स्पष्ट रहेको उनको भनाइ छ ।
उनले खोकना क्षेत्रमा करिब ३७ प्रतिशत जग्गा अघिग्रहण गर्नुपर्ने भएकाले विभिन्न विकल्पमा छलफल भइरहेको जानकारी दिए ।
त्यस्तै प्रधान सेनापति अशोकराज सिग्देलले निर्धारित समयभित्रै द्रुतमार्ग आयोजना सम्पन्न गर्नेगरी नै निर्माण कार्य भइरहेको बताए । अहिले करिब ४३ प्रतिशत काम सम्पन्न भइसकेको र अब हुने काम छिटो सकिने खालको रहेको उनले बताए ।
उनले खोकना प्रवेश विन्दुमा आउन नसकेको अवस्थामा पनि विकल्प तयार गरिएको उल्लेख गरे । खोकना प्रवेश विन्दुको कार्य अघि बढाउँदा सो क्षेत्रको ऐतिहासिक स्थल र सम्पदामा कुनै असर नपर्ने समेत उनले बताए ।
बैठकमा समिति सदस्यहरुले तराई/मधेस द्रूतमार्ग आयोजनालाई समयमा नै सम्पन्न गर्नेगरि काम गर्नुपर्ने र आयोजना निर्माणका क्रममा देखिने समस्यालाई समधान गर्न सरकार समेत गम्भीर हुनुपर्ने सुझाव दिएका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
