चितवन– पेट्रोलियम पदार्थको भण्डारणस्थल बनाउन चितवनको लोथर खोला आडमा जग्गा किनेको आठ वर्षपछि नेपाल आयल निगमले काम सुरु गरेको छ ।
अमलेखगञ्जदेखि लोथरसम्म पाइपलाइनसहितको पेट्रोलियम भण्डारगृह बनाउने परियोजनाको फिल्ड कार्यालयको शुक्रबार उद्घाटन भएको छ । अबको ५४ महिनाभित्र पाइप लाइनसहित भण्डारणस्थलको काम सकिने परियोजनाका प्रमुख प्रदिप कुमार यादवले बताए ।
परियोजनाको अवधि ५४ महिना भए पनि तीन वर्षभित्रै सकिने लक्ष्य लिएको उनले बताए । आयल निगमले २०७३ सालको फागुनबाट त्यहाँ जग्गा किन्न सुरु गरेको थियो ।
निगमको नाममा लोथरमा २३ बिघा १२ कट्ठा जग्गा रहेको छ । निगमले कूल १४ अर्ब नौ करोड ६० लाख रुपैयाँको लागतमा पाइपलाइन र भण्डारस्थल बनाउन लागेको परियोजना प्रमुख यादवले बताए ।
अमलेखगञ्जदेखि लोथरसम्म पाइपलाइनको दूरी ६२ किलो मिटर रहने उनले बताए । पाइपलाइन तयार भएपछि मोतिहारीबाटै लोथरमा पनि पेट्रोलियम पदार्थ पठाइने बताइएको छ ।
इन्डियन आयल कर्पोरेसन (आईओसी)ले विस्तृत परियोजना प्रतिवेदन (डिपिआर) तयार पारेको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
