काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्ड संघीय निजामती विधेयकमा जस्तै विद्यालय शिक्षा विधेयकमा पनि सरकारले षड्यन्त्र गरेको आरोप लगाएका छन्।
काठमाडौंमा शनिबार आयोजित एकीकृत अखिल नेपाल शिक्षक संगठनको एक कार्यक्रमलाई सम्बोधन गर्दै प्रचण्डले अहिलेको सरकार भनेकै जालझेल, ठगी, भ्रष्टाचार र बेइमानी सरकारको परिभाषा जस्तै बनेको बताए।
‘तपाईंहरूले देख्नुभएको छ अहिले जालझेल, ठगी, भ्रष्टाचार, बेइमानी सरकारको परिभाषा जस्तो भएको छ। अहिलेको सरकार भनेकै त्यस्तै हो’ उनले भने।
प्रचण्डले विद्यालय शिक्षा विधेयकलाई संसदमा पुर्याउन धेरै मेहनत गरेको बताए। ‘हाम्रै नेतृत्वको सरकार नभएको भए अघिल्लो शिक्षक आन्दोलनको बेला त्यसरी शिक्षकसँग त्यो रूपमा सम्झौता हुन सक्दैनथ्यो। हाम्रै नेतृत्वको सरकारको कारण शिक्षकसँग सहमति भयो,’ उनले भने।
प्रचण्डले थपे, ‘सहमतिअनुसारको विधेयक ड्राफ्ट गर्ने कुरामा पनि हाम्रै नेतृत्व भएकै कारण त्यो ड्राफ्ट भयो। पछि सदनमा पुर्याउने पक्रियामा विधेयकमाथि चलखेल र छेडखानी भए। क्याबिनेटबाट पास गरेर मैले पठाएको विधेयकमाथि यस्तो भयो।’
उनले निजामती कर्मचारी विधेयकमा जस्तै शिक्षा विधेयकमा पनि छेडखानी भएको स्मरण गरे।
‘जसरी अहिले संघीय निजामती विधेयकमा भएका छेडखानी तपाईंहरू सबैले थाहा पाउनु भएको छ, बडो डरलाग्दो चलखेल भयो। त्यसको बारेमा अहिले संसदीय छानबिन चलिराखेको छ’ उनले भने, ‘त्यतिबेला सदनमा दर्ता नहुँदै मैले थाहा पाएँ कि बीच बाटोमा नै शिक्षकहरूको माग अनुसार कम्तीमा पनि हुनसक्ने जति व्यवस्था गरेर पठाइएको विधेयकमा छेडखानी भयो।’
उनले विधेयकमा छेडखानी भएको थाहा पाएपछि त्यसलाई फिर्ता बोलाएर कर्मचारीहरूलाई राम्रैसँग कमजोरीका लागि आत्मालोचना गराएर फेरि त्यसलाई सुधार गरिएको जिकिर गरे।
प्रचण्डले अहिलेका प्रधानमन्त्री केपी शर्मा ओलीले शिक्षक र शिक्षक आन्दोलनलाई अपमानित गरेको आरोप लगाए।
‘तपाईंहरूको लामो आन्दोलनको क्रममा पनि त्यो आन्दोलनलाई अपमानित गर्ने, शिक्षकहरूलाई अपमानित गर्ने र स्वयं प्रधानमन्त्रीले नै बडो नग्न रूपमा हमला गर्नुभयो। आन्दोलनमाथि र आम शिक्षकहरूमाथि पनि,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778409050-1778409499.jpeg)
-1764146706.png)
