काठमाडौँ– नेकपा (एमाले) का नेता तथा पूर्व सांसद कृष्णभक्त पोखरेलले कांग्रेस–एमालेको सत्ता गठबन्धन आगामी २०८४ सम्म कायम रहने दाबी गरेका छन्।
शनिबार काठमाडौँमा आयोजित साक्षात्कारमा उनले भने,‘यो गठबन्धनको अहिले विकल्प छैन। ०८४ सम्म नै यो गठबन्धन ढुक्कसँग जान्छ। तलमाथि हुने कुनै सम्भावना छैन।’
उनले नेपाली कांग्रेसका नेता डा. शेखर कोइरालाले दलको नेता बन्ने हैसियत नै नराख्ने टिप्पणी गरे। उनले भने,‘उहाँ शेखर कोइरालाले आफ्नो दलभित्र त्यो हैसियत राख्नुहुन्न। अर्को वैकल्पिक सरकार बन्ने कुरा सपनामा पनि नसोचे हुन्छ। त्यस्तो सम्भावना देख्दिनँ।’
उनले वैकल्पिक सरकार बन्ने सवालमा आफ्नो पार्टीभित्रबाट कुनै विद्रोह नहुनेसमेत ठोकुवा गरे। उनले भने,‘हाम्रो पार्टीभित्र विद्रोह हुँदैन। विद्या भण्डारीले विद्रोह गर्न सक्नुहुन्न। उहाँको चरित्र त्यस्तो छैन। अहिले केपी ओलीको नेतृत्व हुँदाहुँदै विद्रोह गर्ने अवस्था छैन ।’
नेता पोखरेलले पूर्वराष्ट्रपति विद्या भण्डारीले पार्टी सदस्यता नवीकरण गरेको कुरा साँचो भएको स्पष्ट पारे। उनले भने, ‘उहाँले पार्टी सदस्यता नवीकरण गर्नुभएको छ, यो कुरा संगठन विभाग प्रमुखले भन्नुभएको छ। उहाँले पनि भन्नुभएको छ।’ उनले अहिले देखिएको ओली र भण्डारीबिचको विवादको सेटलमेन्ट चमत्कारिक रूपमा हल हुने ठोकुवा गरे।
पूर्वराष्ट्रपति भण्डारी एमालेको राजनीतिमा फर्किने विषयले अहिले सिङ्गो मुलुक नै तरङ्गित भएको उल्लेख गरे। तर, एमाले केन्द्रीय कमिटी बैठकपछि यस विषयमा एउटा निष्कर्षमा पुग्ने उनले जानकारी दिए।
उनले भने,‘यो विषयले सिङ्गो देश तरङ्गित भएको छ। एमालेभित्र नभएर कांग्रेसको केन्द्रीय समितिको बैठकमा समेत यो विषय प्रवेश गरेको छ। विज्ञ र विश्लेषकहरूले विचार राख्नुभएको छ। हामी संसदीय प्रणालीलाई अवलम्बन गरेका छौँ। सुधारिएको संसदीय प्रणाली भन्नुपर्छ। राष्ट्रपति भएकाहरू सामान्यतया राजनीतिमा आएको देखिँदैन। खास गरी बेलायत र भारतमा त्यस्तो देखिँदैन। सङ्घीय गणतन्त्रको प्रतीकको रूपमा रहने राष्ट्रपति पुनः राजनीतिमा नआए हुन्थ्यो भन्ने जनताको भावना देखिँदै छ। यो पार्टीको विषयवस्तु भएको हुँदा केन्द्रीय कमिटीको बैठकमा निक्र्यौलमा पुग्छौँ। साउन ५ गतेबाट केन्द्रीय कमिटीको बैठक बस्दै छ। तर, पार्टीकै नेतृत्व गर्ने भन्ने सन्दर्भमा हाम्रो पार्टीमा गम्भीरताका साथ छलफल भइरहेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773902187.png)
-1764146706.png)
-1773837959.png)
