एजेन्सी– इरानले इजरायलको बीर्शेबा शहरमा शुक्रबा बिहान ब्यालेस्टिक मिसाइल आक्रमण गर्यो । टाइम्स अफ इजरायलका अनुसार मिसाइल माइक्रोसफ्ट अफिसको नजिक खसेको थियो । यसमा कैयौं कारमा आगो लागेको छ भने केही घरहरुमा पनि क्षति पुग्यो । यो आक्रमणमा ६ जना घाइते भएको बताइएको छ । बीर्शेबा शहरमा आक्रमण गरिएको यो लगातार दोस्रो पटक हो ।
यसअघि बिहीबार इरानले बीर्शेबाको एक अस्पतालमा मिसाइल प्रहार गरेको थियो । जसमा ५० भन्दा बढी मानिस घाइते भएका छन् ।
इजरायलका केही क्षेत्रमा लगातार साइरन बजिरहेको छ । आईडीएफले इरानका तर्फबाट आउने ब्यालेस्टिम मिसाइल आक्रमणको पत्ता लगाएको छ । एयर डिफेन्स एक्टिभ गरिएको छ । जुन क्षेत्रमा साइरन बजिरहेको छ त्यहाँका नागरिकहरुलाई तत्काल बंकरभित्र जानका लागि निर्देशन दिएको छ ।
यता बेलायतले इरान–इजरायल द्वन्द्वका बीच इजरायलमा रहेका आफ्ना नागरिकको उद्धार सुरु गरेको छ । चार्टर विमानमार्फत् आफ्ना नागरिकहरुलाई निकालिरहेको छ । विदेश सचिव डेभिड लेमीले बेलायत सरकारले यस विषयमा इजरायली अधिकारीहरुसँग कुराकानी गरिरहेको बताएका छन् ।
इजरायली एयरफोर्सले केही समयअघि मात्र इरानको पश्चिम र मध्ये इलाकामा फेरि आक्रमण गरेको छ । आईडीएफका अनुसार सैन्य क्षेत्रहरुमा निशाना बनाइएको हो ।
यता इरानको राजधानी तेहरानमा जुमेको नमाजपछि हजारौं नागरिकले इजरायलविरुद्ध विरोध प्रदर्शन गर्दै आफ्ना नेताहरुको समर्थनमा नारा लगाएका छन् । सरकारी समाचार च्यानलमा विरोधका तस्बिर र भिडियोहरु प्रशारण गरिएको छ ।
अल जजिराको रिपोर्टअनुसार प्रदर्शनकारीले आफ्नो हातमा इजरायलको आक्रमणबाट मारिएका सैनिक अधिकारीहरुको तस्बिर लिएका थिए । प्रदर्शनकारीले इरान, प्यालेस्टाइन र हिजबुल्लाहको झण्डासमेत लहराएका थिए ।
यस्तै इजरायली खुफिया एजेन्सी मोसादका एक एजेन्टलाई इरानले पक्राउ गरिएको बताइएको छ । सरकारी मिडियाका अनुसार आरोपीले व्हाट्सएपमार्फत इरानी एयर डिफेन्ससँग जोडिएका सूचनाहरु इजरायललाई दिने गरेको बताइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
