छविलालको पुनरावेदनलाई सरकारी पक्षको निवेदनसँगै राखेर पेश गर्न उच्च अदालतको आदेश

राजनीति

नेपाल लाइभ बिहीबार, फागुन ८, २०८१ १९:२८

रुपन्देही– सुप्रिम सहकारी ठगी प्रकरणमा रुपन्देही जिल्ला अदालतबाट पुर्पक्षका लागि कारागार चलान भएका पूर्वडिआइजी छविलाल जोशी बन्जाडेको पुनरावेदनलाई ‘लगाउ’ मा राख्न उच्च अदालतले आदेश दिएको छ । जिल्ला अदालतको निर्णयविरुद्ध सरकारी पक्षबाट पनि पुनरावेदन हुने भएकाले सँगै राखेर पेश गर्न उच्च अदालत तुल्सीपुर बुटवल इजलासले भनेको हो ।

समान प्रकृतिको भनिएको मुद्दामा जिल्ला अदालतले रास्वपा सभापति रवि लामिछानेलाई धरौटीमा छोड्ने आदेश गरेको थियो भने छविलाई थुनामा पठाएको थियो । छविले जिल्लाको आदेशविरुद्ध उच्चमा पुनरावेदन गरेका थिए ।

रविलाई धरौटीमा छोड्ने आदेशविरुद्ध पुनरावेदनको तयारी सरकारी पक्षले गरेको छ । उक्त पुनरावेदनलाई छविको पुनरावेदनसँगै राखेर पेश गर्न अदालतले आज आदेश गरेको हो ।

बिहीबार ५ नं इजलासमा न्यायाशीसद्वय किरणकुमारी गुप्ता र पूर्णशीला दवाडी घिमिरेको संयुक्त इजलासले यस्तो आदेश दिएको हो । यसअघि माघ ३० गते यही अदालतबाट न्यायाधीश राजेश्वर तिवारीको एकल इजलासले कैफियत प्रतिवेदन झिकाउन आदेश गरेअनुसार आजको लागि पेशी तोकिएको थियो ।

माघ २८ गते सोमबार जिल्ला अदालत रुपन्देहीले जोशीलाई पुर्पक्षका लागि कारागार चलान गरेपछि उनी उच्च अदालत गएका थिए ।

रुपन्देहीमा सुप्रिम सहकारी ठगीको अभियोग दर्ता भएपछि आफैँ अदालतमा उपस्थित भएका जोशीलाई माघ ३० गते रुपन्देही जिल्ला अदालतका न्यायधीश वशिष्ठकुमार घिमिरेको इजलासले पुर्पक्षका लागि थुनामा पठाउने आदेश भएसँगै उनी कारागार चलान भएका छन् ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

कांग्रेस सम्पूर्ण जातजातिलाई एकापसमा जोड्ने पार्टी होः महामन्त्री थापा

संसद् छँदै अध्यादेश ल्याएर सरकारले गलत गर्‍यो : शेखर कोइराला

कांग्रेस-एमालेलाई प्रचण्डको आग्रह : तपाईंहरू एक हुनुस् र तागत देखाउनुस्, म एक्लै जनतामा जान्छु