काठमाडौं– दशैंका लागि आ–आफ्नो घर फर्किन राजधानी काठमाडौंबाट सवारी टिकट लिनेको संख्या अन्य समयको भन्दा उच्च हुन्छ। यसैका लागि भनेर सरकार तथा विभिन्न यातायात व्यवसायीले अग्रिम टिकट बुकिङ्गको व्यवस्था गर्दै आएका छन्।
_x000D_
_x000D_
वर्षेनी चलिरहने यो प्रक्रियाका लागि यात्रु तथा सर्वसाधारणले सास्ती भोग्नु नपर्ने हो। तर, हरेक वर्ष सहजताका साथ टिकट पाउनु र घर जानु अधिकांश यात्रुका लागि दिवास्वप्न मात्रै हुने गरेको छ। सरकारले बेलैमा उचित प्रबन्ध तथा पहल नगर्नु तथा सेवामुखी व्यवसाय भएपनि यातायात व्यवसायी र कम्पनीहरुले ‘वर्षभरीका लागि बढी नाफा कमाउने सिजन हो’ भन्दै अघि बढ्नुले यात्रुहरु चेपुवामा पर्ने गरेका हुन्।
_x000D_
_x000D_
यसवर्षको दशैं आउन केही दिन मात्रै बाँकी छ। यसअघि करिब १ महिनाको समय राखेर अग्रिम टिकट बुकिङ खुल्ला गरिने भए पनि यातायात व्यवसायीको अडानका कारण गत मंगलबारबाट मात्रै टिकट बुकिङ खुलाउन उनीहरु राजी भए। भदौ ३१ गते यातायात व्यवस्था विभाग र यातायात व्यवसायीबीच बसेको बैठकको निष्कर्षअनुरुप असोज ५ गतेदेखि टिकट बुकिङ खुल्ला गर्ने निर्णय भएको थियो।
_x000D_
_x000D_
तर, कम्पनी ऐनअनुरुप दर्ता भएका यातायात कम्पनी तथा व्यवसायीले तोकिएको समयमै टिकट बुकिङ खुल्ला गरेपनि अन्य अधिकांश यातायात व्यवसायीले भने सहमतिअनुरुपको कार्य गर्न मानेनन् र आन्दोलनमा उत्रिए। पेट्रोलियम पदार्थको मूल्यवृद्धि गरिएको भन्दै यातायात व्यवसायीले भाडा बढाउन माग गर्दै टिकट बुकिङ खुल्ला नगर्ने निर्णयमा पुगेका थिए।
_x000D_
_x000D_
सोपश्चात् सरकार र नेपाल यातायात व्यवसायी राष्ट्रिय महासङ्घ बीच वार्ता भयो र सार्वजनिक सवारीमा १० प्रतिशत भाडा बढाउन दुवै पक्ष एकमत भए। सहमतिअनुरुप गएको मंगलबारबाट सबै यातायात व्यवसायीले टिकट बुकिङ खुलाए।
_x000D_
_x000D_
टिकट बुकिङ नखुल्दासम्म खुल्ने÷नखुल्ने दुविधामा रहेका यात्रुहरु हिजोआज फेरि अर्को समस्यामा पर्ने गरेका छन्। बुकिङ खुल्ला गरिएको २ दिनपछि नै व्यवसायीले टिकट सकियो भन्न थालेपछि यात्रुहरुलाई सास्ती थपिएको हो। मंगलबार र बुधबार सहज रुपमै टिकट प्राप्त गरेको भएपनि बिहीबार भने टिकट काउन्टरमा रहेका कर्मचारीले टिकट सकिएको जानकारी दिने गरेको यात्रुहरुले गुनासो गरेका छन्।
_x000D_
_x000D_
बिहीबार गोंगबुस्थित नयाँ बसपार्कमा भेटिएका पाल्पा तानसेनका बालगोपाल सिंहले आधा घण्टा लाइन बसेपनि टिकट नपाएको गुनासो गरे। ‘आधा घण्टा लाइन बसें। आफ्नो पालो आइनपुग्दै टिकट सकियो भनियो।’, उनले प्रश्न गरे, ‘दुई दिनमै सबै टिकट कसरी सकिन्छ? अब काठमाडौंका यत्रा यात्रु कसरी घर पुग्ने?’
_x000D_
_x000D_
सिंहले नियम बनेपनि त्यसको प्रभावकारी कार्यान्वयन नहुँदा जनतालाई सास्ती कम नभएको बताए। ‘सरकारले सिन्डिकेटको अन्त्य भएको भनेर घोषणा त गर्यो। तर, यो कार्यान्वयनमा आउन सकेको देखिँदैन। जसको उदाहरण यसपटकको टिकट बुकिङमा यातायात व्यवसायीको अडानलाई लिन सकिन्छ।’, उनले भने, ‘मलाई लाग्छ नेपालमा जस्तो सुकै नियम ल्याए पनि लागू नै हुँदैन। सबै नियमहरु भनाइमा सुन्दा आनन्द लागेको तर प्रयोगमा आएको नदेख्दा यात्रुहरु खिन्न छन्।’
_x000D_
_x000D_
उनले जनताको सेवासँग जोडिएको विषयमा यातायात व्यवसायी पनि जिम्मेवार बन्नुपर्ने तर्क गरे। सिंह असोज ३० गतेका लागि नयाँ बसपार्कस्थित पश्चिम नेपाल बस व्यवसायी संघको टिकट काउन्टरमा पुगेका थिए।
_x000D_
_x000D_
उता नेपाल यातायात व्यावसायी महासंघका महासचिब सरोज सिटौला भने यात्रुहरुलाई सहज रुपमा टिकट बुकिङको वातावरण मिलाएको दाबी गर्छन्। उनले भने, ‘यात्रुहरुले अन्तिम अन्तिम सिट भएपछि टिकट पाइएन भन्ने गरेका छन्। अहिले नै टिकट नपाइने भन्ने वातावरण छैन।’
_x000D_
_x000D_
महासचिब सिटौलाले दशैंभरीका लागि देशभरका यात्रुलाई मध्यनजर गर्दै सबै क्षेत्रमा यातायातको सहज पहुँच पुर्याउने बताए। ‘कुनै स्थानमा आवतजावतको समस्या देखिएमा गाडी थप गरेर भए पनि यात्रुहरुलाई गन्तव्यसम्म पुर्याउँछौं।’, उनले प्रतिबद्धता जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
