काठमाडौं– नेपाल समाजवादी पार्टी (नयाँ शक्ति) का अध्यक्ष बाबुराम भट्टराईले नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' को नेतृत्वमा भ्रष्टाचारविरोधी र सुशासनका मुद्दामा आन्दोलन गर्नु भनेको नेपाली जनताको सहज बुद्धिमाथि मजाक हुने बताएका छन्।
माओवादीले शनिबार काठमाडौंमा प्रदर्शन गर्ने तयारी गरेको छ। त्यसप्रति लक्ष्य गर्दै भट्टराईले सत्ताको खेलबाट बाहिर फालिएका प्रचण्डले सुशासनको मुद्दा उठाएर आन्दोलन गर्ने धम्की दिइरहेको उल्लेख गरेका हुन्।
‘प्रचण्डनिकट केही साथीहरूले फेरि एक पटक हामीलाई समेत जोडेर 'पूर्व माओवादीहरू' एक ठाउँमा आउनुपर्ने कुरा गर्न थालेका छन्,’ भट्टराईले सामाजिक सञ्जाल एक्समा पोस्ट गरेका छन्, ‘अनि भर्खरै सत्ताको खेलबाट बाहिर फालिएका प्रचण्डले सुशाशनको मुद्दा उठाएर आन्दोलन गर्ने धम्की दिइरहेछन्। यसबारे केही प्रष्ट्याउनु जरूरी भएको छ- पहिलो कुरा, सबै पूर्व माओवादीहरू किन एक ठाउँमा जम्मा हुने? अर्को जनयुद्ध गर्न? या भोजभतेर गर्न? या फेरि एक पटक प्रचण्डलाई संसदीय सत्तारोहण गराउन?’
माओवादी आन्दोलनले देशमा आफ्नो ऐतिहासिक कार्यभार केही कमीकमजोरीसहित पूरा गरिसकेको पनि उनले बताए।
‘विश्व एक्काइसौं शताब्दी सँगसँगै चौथो औद्योगिक क्रान्तिको चरणमा पुगेको छ। सम्पूर्ण विश्व नै भूमण्डलीकृत वित्तीय पुँजीवादको चंगुलमा परेको छ। हामी भने पहिलो औद्योगिक क्रान्तिको चरणमा छौं। अनि किनारा पुँजीवादको रूपमा असमान र परनिर्भर सम्बन्धमा बाँधिन पुगेका छौं। यो स्थितिमा अब हामीले पुरानो जनयुद्धकालीन अवस्था निम्ति उपयुक्त माओवादी विचार-राजनीति र स्टालिनवादी अति केन्द्रीकृत ढाँचाको कम्युनिष्ट पार्टीको माध्यमबाट नयाँ युगका कार्यभार पूरा गर्न सक्दैनौं,’ भट्टराईको भनाइ छ।
उनले अगाडि बढेको राजनीतिक उपरिसंरचना र पछाडि परेको आर्थिक-सामाजिक-सांस्कृतिक आधारबीचको प्रधान अन्तरविरोधलाई छिटो हल गरेर बाँकी विश्वसँग पदचाप मिलाउँदै अघि बढ्नु पर्नेमा पनि जोड दिएका छन्।
‘त्यसनिम्ति हामीले नयाँ युगको नयाँ कार्यभार पूरा गर्न विचार, राजनीति, संगठन, नेतृत्व लगायत सबै क्षेत्रमा नयाँ विकास गर्नु परेको छ। तसर्थ हामीले समावेशी र सहभागितामूलक लोकतन्त्रमा आधारित नयाँ समाजवादको मोडेल, जसलाई हामीले समुन्नत समाजवादभनेका छौं, विकास गर्नुपर्ने आवश्यकता देखेका छौं। हिजो जनयुद्धकालमा पनि हामीले वैचारिक-राजनीतिक कार्यदिशा ठीक हुनु वा नहुनुले नै क्रान्तिमा सबै कुराको फैसला गर्छ भन्ने गरेका हैनौं? तर अहिले समय र परिस्थिति अनुकुल नयाॅ कार्यदिशा, संगठन, नेतृत्वको क्षेत्रमा विकासबारे कुनै चर्चा नगरी खालि भावनात्मक ढंगले 'सबै पूर्व माओवादी एक ठाउँमा आउँ ' भन्नुको के अर्थ रहन्छ?,’ उनको प्रश्न छ।
पुरानो 'कम्युनिष्ट' सत्ताहरू सबैतिर तासको घरझैं ढल्दै गइरहेको, भूमण्डलीकृत नव-उदारवादी पुँजीवादले चरम असमानता, पर्यावरण विनाश, आणविक हतियारको विभीषिका, एआईको अनिश्चितता सिर्जना गरेर विश्व र मानवजातिलाई त्राहीमाम् पारिरहेको अवस्थामा विचार, दर्शन, राजनीति, अर्थशाश्त्र, समाजशाश्त्र सबै क्षेत्रमा नयाँ संश्लेषण आवश्यक हुन्छ कि हुन्न भन्ने प्रश्न पनि भट्टराईको छ।
‘फेरि नेपालको जटिल भूराजनीति, चरम जातीय/भाषिक/क्षेत्रीय विविधता, अति अविकसित/अल्पविकसित अर्थतन्त्र लगायतको परिवेशमा समग्र राजनीति, पार्टी, नेतृत्वको पुनर्संरचना गर्नुपर्छ कि पर्दैन? यति गम्भीर र दूरगामी महत्वको विषयमा पूर्वमाओवादी मात्र हैन सबै पार्टी भित्रका अग्रगामी सोच भएका व्यक्तिहरू, सार्वजनिक बौद्धिकहरू र विशेषत: सिर्जनशील तथा उर्जावान नयाँ पुस्ताका युवाहरूबीच बृहत बहस चलाएर नयाँ अग्रगामी वैकल्पिक शक्ति निर्माण गर्नु आजको आवश्यकता हैन र?,’ उनले भनेका छन्।
अब प्रचण्डको नेतृत्वमा भ्रष्टाचारविरोधी र सुशाशनको निम्ति आन्दोलन गर्नु भनेको नेपाली जनताको सहज बुद्धिको अवमूल्यन र उनीहरूमाथि ठूलो मजाक हुने पनि भट्टराईको भनाइ छ।
‘जनयुद्धकालको मध्यचरणदेखि नै वर्ग-उत्थानीकरण हुँदै गएका प्रचण्ड र उनका आसेपासेहरूको शान्ति प्रक्रियायताको तीव्र नैतिक स्खलन तथा कथनी र करणीबीचको अन्तर कसले बुझेको छैन र?,’ उनले भनेका छन्, ‘देशले अग्रगामी निकास खोज्छ खोज्छ। हाम्रो हालैको पोखरामा सम्पन्न विधान अधिवेशन र नेसपा (नयाँ शक्ति) को पुनरोदय त्यही दिशाको विनम्र पाइलो हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
