रुपन्देही–सकिएको कामको बजेट नपाएको भन्दै लुम्बिनी विकास कोषका पदाधिकारीमाथि ठेकेदारहरूले हातपात गरेका छन्।
राष्ट्रियसभाको संघीयता सबलीकरण तथा राष्ट्रिय सरोकार समितिको लुम्बिनीस्थित एक होटलमा मंगलबार कार्यक्रम भइरहेको बेला निर्माण व्यवसायीहरूको एक हुल आएर कोषाध्यक्ष ढुण्डिराज भट्टराई र सदस्य सचिव सानुराजा शाक्यमाथि आक्रमण गरेका हुन्।
गुण्डागर्दी शैलीमा कोषाध्यक्ष र सदस्य सचिवमाथि आक्रमण भएको प्रत्यक्षदर्शी कर्मचारीले बताए। करिब २० जनाको समूहले एकाएक कार्यक्रमस्थलमै आएर कुटपिट गरेको कोषाध्यक्ष भट्टराईले बताए। कुटपिटबाट सदस्य सचिव शाक्यको मुखमा चोट लागेको छ।
केही दिनदेखि गुरूयोजनाको कामको भुक्तानी नपाएको भन्दै निर्माण व्यवसायीले असन्तुष्टि जनाइरहेका थिए। माग सम्बोधन गरी समाधान गर्न लागिरहेको बेला हुलहुज्जतसहित अपमानजनक रूपमा आक्रमण गरिएको कोषाध्यक्ष भट्टराईले गुनासो गरे। आफ्नो ज्यान नै जोखिममा परेको भन्दै उनले सुरक्षाको प्रत्याभूति नहुँदासम्म कुनै चेकमा हस्ताक्षर नगर्ने बताए।
ठेकेदार कम्पनीहरूलाई भुक्तानी गर्ने रकम सरकारबाट निकासा नआउँदा भुक्तानीमा ढिलाइ भइरहेकोमा हिजोमात्र कोषको खातामा रकम जम्मा भएको थियो। भुक्तानीको प्रक्रिया सुरू गर्न आजै अपरान्ह उपाध्यक्ष ल्हारक्याल लामासहितको बैठक डाकिएको थियो। धर्नामा रहेका निर्माण व्यवसायीलाई सोसम्बन्धी जानकारी गराएर आफू कार्यक्रममा आएको भट्टराईले नेपाल प्रेसलाई बताए।
भट्टराईका अनुसार कोषका पदाधिकारी सुरक्षाको माग गर्दै जिल्ला प्रशासन कार्यालय रुपन्देही जाने तयारीमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
