काठमाडौं– गत आर्थिक वर्ष २०८०/०८१ (एक वर्षभरी) मा वैदेशिक रोजगारीका लागि साढे ७ लाख नेपाली विदेशिएका छन्। सोही अवधिमा १ हजार ३४६ जना नेपाली श्रमिकले ज्यान गुमाएका छन्। २०८० साउन १ देखि ०८१ असार मसान्तसम्मको अवधिमा श्रम स्वीकृति लिएर ७ लाख ४१ हजार २९७ नेपाली विश्वभरका १४९ मुलुकमा वैदेशिक रोजगारीमा गएको वैदेशिक रोजगार विभागले जनाएको छ।
रोजगारीका निम्ति नेपाली एसिया, अस्ट्रेलिया, अफ्रिका, युरोप, दक्षिण अमेरिका र उत्तर अमेरिका महादेशका धेरैजसो देशमा पुगेका विभागले जनाएको छ। संयुक्त राष्ट्रसंघमा हाल १९३ देश सदस्य छन्। तीमध्ये ७७.२० प्रतिशतमा नेपाली रोजगारीका लागि गएको विभागको भनाइ छ।
गत आर्थिक वर्ष वैदेशिक रोजगारीमा गएका मध्ये सबैभन्दा बढीको रोजाइमा युनाइटेड अरब इमिरेट्स (यूएई) परेको छ। यूएईमा सबैभन्दा बढी एक लाख ९३ हजार ४३८ जना गएका छन्। सबैभन्दा कम अल्जेरियालगायत १७ देशमा एक÷एकजना मात्र गएका छन्।
सबैभन्दा ठूलो संख्यामा नेपाली वैदेशिक रोजगारीमा गएका देशमा क्रमशः यूएई, साउदी अरेबिया, कतार, मलेसिया, कुवेत, क्रोएसिया, रोमानिया, जापान, दक्षिण कोरिया, बहराइन, माल्दिभ्स, मौरिसस, साइप्रस, ओमान र माल्टा छन्। उक्त अवधिमा दोस्रो ठूलो संख्यामा नेपाली रोजगारीका लागि साउदी अरेबिया गएका छन्। साउदी अरेबियामा १ लाख ४१ हजार ५०२ नेपाली गएका हुन्।
यस्तै, गत आर्थिक वर्ष वैदेशिक रोजगारीका क्रममा कतारमा एक लाख ३४ हजार ६६९, मलेसियामा एक लाख तीन हजार ४४२, कुवेतमा ४० हजार ३६८, क्रोएसियामा १५ हजार ३६४, रोमानियामा १५ हजार २१, जापानमा १३ हजार ८६४ र दक्षिण कोरियामा १३ हजार २६ नेपाली गएका छन्।
बहराइनमा ९ हजार ८०६, माल्दिभ्समा ७ हजार ४५५, मौरिससमा ७ हजार ४०८, साइप्रसमा ६ हजार ९५०, ओमनमा ५ हजार ९१० र माल्टामा ५ हजार ६६८ नेपाली रोजगारीका निम्ति श्रम स्वीकृति लिएर गएका छन्।
१ हजार बढिले गुमाए ज्यान
वर्षभरिमा १ हजार बढि नेपाली श्रमिकले बोर्ड ज्यान गुमाएका छन्। गत आर्थिक वर्ष २०८०÷०८१ मा वैदेशिक रोजगारमा गएका १ हजार ३४६ जना नेपाली श्रमिकले ज्यान गुमाएको बोर्डले जनाएको छ। जसमध्ये ४४ जना नेपालीले कार्यस्थल दुर्घटनाबाट ज्यान गुमाएका छन्। यस्तै हृदयघात हुँदा १८९ जना नेपाली श्रमिकको ज्यान गएको बोर्डको तथ्यांकमा उल्लेख छ। सडक दुर्घटनाबाट १३५ जना नेपालीको ज्यान गएको तथ्यांकमा उल्लेख छ। प्राकृतिक मृत्यूबाट २१० जना नेपालीले ज्यान गुमाएका छन्। २८ जना क्यान्सर, ४७ जना विरामी परेर मृत्यु भएको बोर्डको तथ्यांकमा उल्लेख छ।
यस्तै ६१ जना थाहा नभएको, ३० आत्महत्या, मृगौला रोगले ३ जना, ७ जना हत्या, ७ कोभिड १९, २८७ रोग, ८७ अन्य कारणले मृत्यु भएको र ५४ जना श्रमिकको के कारण मृत्यु भएको भन्ने बारे अनुसन्धान भइरहेको बोर्डले जनाएको छ।
सबैभन्दा धेरै मृत्यु खाडीमा
वैदेशिक रोजगारीका लागि नेपालीहरु सबैभन्दा धेरै खाडी मुलुकमा गएको तथ्यांक छ। यस्तै वैदेशिक रोजगारीमा रहेका श्रमिकहरु मृत्यु हुनेमध्ये पनि सबैभन्दा धेरै खाडी मुलुकमा नै रहेको पाइएको छ। जसमध्ये नेपाली श्रमिक मृत्यु हुनेमा सबैभन्दा बढि साउदी अरेबियामा रहेको बोर्डको तथ्यांकमा उल्लेख छ। साउदी अरेबियामा ३४८ जना नेपाली श्रमिकले ज्यान गुमाएका छन्। यस्तै दोस्रोमा मलेसिया रहेको छ। मलेसियामा ३४५ जना श्रमिकले विभिन्न कारणवस ज्यान गुमाएका छन्।
यस्तै नेपाली श्रमिकको मृत्यु हुने तेस्रो स्थानमा कतार चौथो युएई र पाँचौँ कुवेत रहेको तथ्यांकमा उल्लेख छ। कतारमा २४०, युएईमा २३१ र कुवेतमा ६२ जना नेपाली श्रमिकले ज्यान गुमाएका छन्।
यस्तै द.कोरियामा २८ बहराइन १७, जापान १७ रोमानिया १२, क्रोएशिया ९, ओमान ५, पोल्याण्ड ४, जोर्डन, माल्दिभ्स र मौरिससमा ३÷३ जना, साइप्रस, इजराइल, माल्टा, रसिया, ससेस्ज र उज्बेकिस्तानमा २÷२ जना, इजिप्ट, हङकङ, काजकिस्तान, मोजाम्बिक, न्यूजिल्याण्ड, वेलायत र अफगानिस्तानमा १÷१ जना नेपाली श्रमिकले ज्यान गुमाएको तथ्यांकमा उल्लेख छ।
४७ करोड बढी आर्थिक सहायता प्रदान
विदेशमा मृत्यु हुने नेपाली श्रमिकमध्ये ९०७ जनाले क्षतिपूर्तिवापत रकम प्राप्त गरेका छन् भने ४३९ जनाले क्षतिपूर्ति पाउन बाँकी रहेको बोर्डको तथ्यांकमा उल्लेख छ। ९०७ जनालाई बोर्डले ४७ करोड ६२ लाख ७५ हजार रुपैयाँ क्षतिपूर्तीवापत रकम वितपरण गरेको छ। जसमध्ये ७ लाख रुपैयाँ प्राप्त गर्ने ६७२ जना रहेका छन् भने उनीहरुले ४७ करोड ४लाख रुपैयाँ प्राप्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790399464.jpeg)
-1786602170.png)
