धनगढी- सुदूरपश्चिम प्रदेशको मंगलबारदेखि सुरु भएको विशेष अधिवेशनमा मुख्यमन्त्री दीर्घबहादुर सोडारी अनुपस्थित भएका छन्। दिउँसो २ बजे सुरु भएको बैठकमा प्रदेशको भूमि व्यवस्था, कृषि तथा सहकारी मन्त्री टिका थापाबाहेक मुख्यमन्त्री र मन्त्रीहरु अनुपस्थित रहेका थिए।
मुख्यमन्त्री र मन्त्रीहरु बैठकमा उपस्थित नभएपछि नेपाली कांग्रेस संसदीय दलको कार्यालयले मुख्यमन्त्री सोडारीले प्रदेश प्रमुखको अपमान गरेको ठहर गरेको छ।
दलका नेता कमलबहादुर शाहद्वारा जारी विज्ञप्तिमा भनिएको छ, ‘प्रदेश प्रमुखले यस्तो प्राकृतिक विपत्तिमा परेका प्रदेशबासीलाई उद्धार, राहात, पुनर्स्थापना र घाइतेको उपचारका लागि प्रदेश सभामा आवश्यक छलफल गर्न आह्वान गरिएको अधिवेशनमा मुख्यमन्त्री अनुपस्थित हुनु प्रदेश प्रमुखको अपमान भएको दलको ठहर छ।’
नेता शाहले मुख्यमन्त्रीले गैरसंवैधानिक, गैरजिम्मेवार र सत्तालिप्सा कार्य गरिरहेको बताए। उनले भने, ‘विपत्ति र प्रदेश बजेट शून्यताको अवस्थामा आइपुग्दा कुनै कोणबाट विश्वासको मत प्राप्त गर्न नसक्ने अल्पमतमा रहेको कामचलाउ प्रदेश सरकारका मुख्यमन्त्रीले पदबाट राजीनामा दिएर माग्रप्रशस्त गर्न आग्रह गर्दछु।’
उनले गम्भीर परिस्थितिमा संवेदनशील भई प्रदेशको गरिमा बढाउन प्रदेशमा रहेका राजनीतिक दल र प्रदेश सभा सदस्यहरुले काम गर्न आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
