काठमाडौं– नेकपा एमालेका अध्यक्ष केपी शर्मा ओली प्रधानमन्त्रीमा नियुक्त भएका छन्। एमाले र कांग्रेसको दाबी अनुसार आइतबार राष्ट्रपति रामचन्द्र पौडेलले ओलीलाई प्रधानमन्त्रीमा नियुक्त गरेका हुन्।
ओलीको यो चौथो पटक हो। यसअघि उनी तीनपटक प्रधानमन्त्री भइरहेका छन्। उनको शपथ भोलि अर्थात सोमबार ११ बजे हुनेछ। कांग्रेसका ८८ सांसदको समर्थनमा शुक्रबार राति ओलीले संविधानको धारा ७६ (२) बमोजिम प्रधानमन्त्रीको दाबी पेश गरेका थिए। कांग्रेस एमाले गठबन्धनलाई जसपा, जनमत पार्टी, जसपा नेपाल, लोसपा, नागरिक उन्मुक्ति पार्टीको समेत साथ छ।
कांग्रेस एमालेले ओलीको शपथ लगत्तै साना दलहरूलाई पनि साथ लिएर मन्त्रिपरिषद्लाई पूर्णता दिने तयारी गरेका छन्। ओली पहिलो पटक २०७२ असोज २४ मा प्रधानमन्त्री बनेका थिए। त्यसबेला उनले १० महिनाको कार्यकाल बिताए। २०७४ को निर्वाचनमा एमाले र माओवादीबीच चुनावी गठबन्धन भएपछि दुई तिहाई नजिक बहुमत आएको थियो। त्यसबेला उनी वाम गठबन्धनको तर्फबाट दोस्रोपटक २०७४ फागुन ३ गते प्रधानमन्त्रीमा नियुक्त भए।
सरकार बनेपछि माओवादी र एमालेबीच पार्टी एकतासमेत भयो। तर बीचमा पार्टीभित्र विवाद भएपछि सर्वोच्चमा मुद्दा पर्यो। सर्वोच्चले पार्टी विभाजन गरिदियो। माओवादी र एमाले अलग भए। त्यतिमात्र नभइ एमालेभित्रकै माधव नेपालसमेत प्रचण्ड र कांग्रेसको साथमा उभिएपछि संसद विघटनसम्म पुग्यो।
संसद विघटन हुनुअघि ओलीले तीन वर्ष प्रधानमन्त्रीको रुपमा कार्यरत थिए। त्यसपछि विश्वासको मत नपाएपछि ओलीले सदनको ठूलो दलको हैसियतमा २०७८ बैशाख ३० देखि असार २९ सम्म तेस्रो कार्यकाल सम्हाले। सर्वोच्चले प्रतिनिधि सभा पुनर्स्थापित गर्दै कांग्रेस सभापति देउवालाई प्रधानमन्त्रीमा नियुक्त गर्न परमादेश जारी गरेपछि उनी पदमुक्त भए।
अहिले भने उनले तीनै देउवाको साथ लिएर चौथोपटक प्रधानमन्त्रीका रुपमा सिंहदरबारमा प्रवेश गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
