तेह्रथुम – तेह्रथुमबाट दलहरुले संघीय र प्रादेशिक निर्वाचनका लागि धमाधम उम्मेदवार सिफारिश गरिरहेका छन्।
अहिलेसम्म नेपाली काँग्रेस, नेकपा एमाले, नेकपा माओवादी केन्द्र र संघीय समाजवादी फोरमले उम्मेदवारका आकाङ्क्षीको सूची सिफारिश गरेको जनाएका छन्।
नाम सिफारिश भएपछि उम्मेदवारीका लागि नेताहरुको दौडधुपसमेत शुरु भएको छ।
तेह्रथुममा प्रतिनिधि सभामा प्रत्यक्षतर्फ नेपाली काँग्रेसबाट केन्द्रीय सदस्य तथा भौतिक पूर्वाधार तथा यातायात राज्यमन्त्री सीता गुरुङको नाम सर्वसम्मत सिफारिश भएको छ।
एमालेले सांसद भवानीप्रसाद खापुङ, पूर्वजिल्ला अध्यक्ष तेजमान कन्दङवा र पूर्वसभासद् विष्णुमाया विकको नाम सिफारिश गरिएको छ।
माओवादी केन्द्रले निजी तथा संस्थागत विद्यालय अर्गनाइजेशन प्याब्सनका केन्द्रीय अध्यक्ष विजय सम्बाहाम्फेलाई सिफारिश गरेको छ।
संघीय समाजवादी फोरमले केन्द्रीय महासचिव रणध्वज कन्दङवा, डिबी सुब्बा, तीर्थ अधिकारी, इन्द्र सुब्बाको नाम पठाएको जनाएको छ। समानुपातिकतर्फ अझै धेरै आकाङ्क्षी देखिएका छन्।
काँग्रेसले प्रतिनिधि सभा समानुपातिकतर्फ पूर्वसभासद् तुलसी सुब्बा, पूर्वजिल्ला सभापति रामनारायण ढुंगाना, गुरुप्रसाद भट्टराई र राज्यप्रसाद लिम्बूको नाम सिफारिश गरेको छ।
नेकपा एमालेले भीमप्रसाद घिमिरे, अर्जुन ढुंगाना र जमुना सुवेदी तथा माओवादी केन्द्रले केन्द्रीय पोलिटब्यूरो सदस्य दुर्गाप्रसाद चापागाईं र पूर्वविधायक फुर्वी शेर्पाको नाम पठाएको छ।
यस्तै संघीय समाजवादी फोरम नेपालले लोकबहादुर सिंगक, वेदाहाङ कन्दङवा, अस्मिता याख्खा र मानभगत दमाईंको नाम पठाएको जनाएको छ।
प्रदेश सभा सदस्य निर्वाचनतर्फ क्षेत्र नं १ मा प्रत्यक्षतर्फ काँग्रेसले जिल्ला सभापति गोविन्द ढुंगानाको नाम सर्वसम्मत पठाएको छ भने एमालेले पनि जिल्ला अध्यक्ष लक्ष्मण तिवारी र पूर्वजिविस सभापति किशोरचन्द्र दुलालको नाम सिफारिश गरेको छ।
माओवादी केन्द्रले जिल्ला संयोजक इन्द्र इम्सङ र सहसंयोजक गणेशकुमार सेनको नाम पठाएको छ । संघीय समाजवादी फोरमले सूर्य मादेनको नाम सर्वसम्मत पठाएको छ।
यस्तै समानुपातिकतर्फ नेपाली काँग्रेसबाट अर्जुन तुम्बाहाम्फे, अर्जुन माबोहाङ, सन्तोष सुब्बा, विपीन सुब्बा, टेकराज तिगेलालगायत दर्जनभन्दा बढी नेताहरुको नाम सिफारिश भएको छ।
एमालेबाट प्रदेश कमिटी सदस्य अनुभूतिबम नेपाली, पिताम्बर तिम्सिना, धर्म खुलाल, गणेश सोदेम्बा, तुलसी अधिकारी, रेनुका भट्टराई र तारा गुरुङको नाम पठाइएको पार्टीले जनाएको छ।
यस्तै माओवादी केन्द्रले दिलकुमारी लिम्बू र तेजेन्द्र कुरुम्बाङको नाम पठाएको छ भने संघीय समाजवादी फोरमले सर्वजित निङलेकु, नारायणमान गुरुङ र सेमिमा तुम्बाहाम्फेको नाम पठाएको छ।
प्रदेश सभा सदस्यको निर्वाचन क्षेत्र नं २ मा प्रत्यक्षतर्फ नेपाली काँग्रेसले नारायणकुमार इङनाम, बालकुमार गुरुङ र उत्तमसिंह थाम्देनको नाम सिफारिश गरेको छ।
एमालेले बाबुराम थापा, सिर्जना लामा र विश्वराज खापुङ तथा माओवादी केन्द्रले सुशिला कन्दङवा, भीमप्रसाद कन्दङवा र ताराप्रसाद भटराईको नाम पठाएको जनाएका छन्।
संघीय समाजवादी फोरमले भने यो क्षेत्रबाट पनि सर्वसम्मत रुपमा सन्तोष लिम्बूलाई उम्मेदवार बनाउने भएको छ । प्रदेश सभा क्षेत्र नं २ मा नै समानुपातिकतर्फ काँग्रेसले गणेश घिमिरे, केशव भेटुवाल, भीष्म थपलिया, हरिप्रसाद डाँगी, हेमन्त गुरुङ, केदार गहतराज, जमुना वर्देवा लगायतको नाम सिफारिश गरेको जनाएको छ।
एमालेले रामचन्द्र थपलिया, नेत्र पन्धाक र लक्ष्मी कार्की तथा माओवादी केन्द्रले तेजमान कन्दङवा, बलिराज इङनाम र चुडामणि बरालको नाम पठाएको माओवादी केन्द्रले जनाएको छ।
संघीय समाजवादी फोरमले कपिलदेव सिंगक, सावित्रा राई, सुवीन्द्र थेगुवा र मानध्वज सम्बाहाम्फेको नाम पठाएको छ । जिल्लाबाट राप्रपा, लिम्बुवान्, नेकपा मालेलगायत दलहरुले पनि उम्मेदवारको नाम तय गरिरहेको बुझिएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
