काठमाडौं – चालू आर्थिक वर्षको वैशाख मसान्तसम्म (१० महिना) मा १० महिनामा नेपालको व्यापार १६८ वटा देशसँग भएको छ। जसमध्ये १३३ वटा देशसँग नेपालको व्यापार घाटामा रहेको छ भने ३५ देशसँग मात्रै देशको व्यापार नाफामा रहेको केन्द्रीय भन्सार विभागले जनाएको छ।
यस्तै चालू आर्थिक वर्षको १० महिनामा १४ खर्ब २९ अर्ब ५३ करोड रुपैयाँ बराबरको वैदेशिक व्यापार भएको छ। जसमध्ये १३ खर्ब ३ अर्ब ३५ करोड रुपैयाँको कूल आयात भएका छ भने १ खर्ब २६ अर्ब १७ करोड रुपैयाँ बराबरको वस्तु निर्यात भएको छ। जसअनुसार देशको व्यापार घाटा ११ खर्ब ७७ अर्ब १८ करोड रुपैयाँ बराबर रहेको विभागले जनाएको छ।
अघिल्लो वर्षको सोहि अवधिमा १४ खर्ब ६६ अर्ब २२ करोड रुपैयाँ बराबरको वैदेशिक व्यापार भएको थियो। जसअनुसार वैदेशिक व्यापारमा २.५० प्रतिशतले गिरावट आएको केन्द्रीय भन्सार विभागले जनाएको छ।
जमध्ये अघिल्लो वर्षको सोही अवधिमा १३ खर्ब ३५ अर्ब ३२ करोड रुपैयाँको आयात हुँदा १ खर्ब ३० अर्ब ९० करोड रुपैयाँको निर्यात भएको थियो। जसअनुसार देशको अघिल्लो वर्ष व्यापार घाटा १२ खर्ब ४ अर्ब ४२ करोड रुपैयाँ रहेको विभागको तथ्यांकमा उल्लेख छ।
प्रतिशतका हिसाबमा भन्ने होभने चालू वर्षको १० महिनामा ९१.१७ प्रतिशतको आयात हुँदा ८.८३ प्रतिशत निर्यात भएको छ। गत वर्षको सोही अवधिमा ९१.०७ प्रतिशत आयात हुँदा ८.९३ प्रतिशत निर्यात भएको थियो।
यस्तै आयात निर्यात दुवैम गिरावट आएपनि राजस्व संकलन भने अघिल्लो वर्षको तुलनामा बढेको छ। चालू वर्षको वैशाख मसान्तसम्ममा भन्सार बाट ३ खर्ब ४२ अर्ब ७७ करोड रुपैयाँ बराबर राजस्व संकलन गरेको छ। गत वर्षको यसै अवधिमा ३ खर्ब ८ अर्ब ४४ करोड रुपैयाँ बराबर राजस्व संकलन भएको विभागको तथ्यांकमा उल्लेख छ।
२ खर्ब ७६ अर्बको पेट्रोलियम पदार्थ आयो
वैशाख मसान्तसम्ममा सबैभन्दा बढि पेट्रोलियम पदार्थ आयात भएको भन्सार विभागको तथ्यांकमा उल्लेख छ। सो अवधिमा २ खर्ब ७६ अर्ब ७ करोड रुपैयाँको पट्रोलियम पदार्थ आयात भएको छ।
३४ अर्ब २२ करोड रुपैयाँको फार्मासिटिकल प्रोडक्ट, ४८ अर्ब ६२ करोड रुपैयाँ बराबरको प्लाष्टिक तथा प्लाष्टिकजन्य वस्तु आयात भएको छ। १ खर्ब २३ अर्ब २३ करोड रुपैयाँको फलाम तथा फलामजन्य वस्तु, ८७ अर्ब रुपैयाँ बराबरको बोइलर मेशिन,८४ अर्ब ४१ करोड रुपैयाँको इलेक्ट्रिकल मेशिन, ४२ अर्ब २४ करोडको मेटल, ६७ अर्ब रुपैयाँको सवारी साधनका पार्टपुर्जा, आयात भएको भन्सार विभागको तथ्यांकमा उल्लेख छ।
४४ अर्ब ६८ करोडको फलफूल र तरकारी
वैशाख मसान्तसम्ममा ४४ अर्ब ६८ करोड रुपैयाँ बराबरको फलफूल र तरकारी आयात भएको छ। जसमध्ये २४ अर्ब ७० करोड रुपैयाँ बराबरको तरकारी आयात भएको छभने १९ करोड ९८ करोड रुपैयाँ बराबरको फलफूल आयात भएको छ।
४० अर्ब ७ करोड रुपैयाँको मोती आयात भएको छभने ३३ अर्बको कपडा, ४० अर्ब ३९ करोड रुपैयाँको प्रशोधित तथा पामतेल आयात भएको छ।
यी हुन सर्वाधिक निर्यात भएका वस्तु
चालू आर्थिक वर्षको १० महिनामा सर्वाधिक निर्यात हुने वस्तुमध्ये फलाम तथा फलामका तयारी सामग्री, कपडा, चियाकफी, फलफूक तथा तरकारीका बोटबिरुवा, रहेका छन्। जसमध्ये १४ अर्ब ६ करोड रुपैयाँको फलाम तथा फलामजन्य वस्तुनिर्यात भएको छ। यस्तै ११ अर्ब ४१ करोड रुपैयाँ बराबरको चिया कफी निर्यात भएको छ।
यस्तै वैशाख मसान्तसम्ममा ९ अर्ब ५४ करोड रुपैयाँको नेपाली गलैँचा, १२ अर्ब ४६ करोडको कपडा, ६ अर्ब ७९ करोडको काठ, ७ अर्ब २० करोडको फलफूल र तरकारीका बिरुवा,७ अर्ब ४४ करोडको प्रशोतित तेल लगायतका वस्तुहरु निर्यात भएको विभागको तथ्यांकमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789992067.jpeg)
-1789631269.jpg)
