काठमाडौं– शुक्रबारदेखि सुरु हुने भनिएको बजेट अधिवेशन छलफलमै नगई केही समयका लागि स्थगित भएको छ। सदनको बैठक सुरु हुनेवित्तिकै कांग्रेसले विरोध गरेपछि सभामुख देवराज घिमिरेले १५ मिनेटका बैठक स्थगित गरेका हुन्।
अधिवेशन प्रारम्भमा अन्य कुराहरु नगरी विषयवस्तुमा प्रवेश गर्न सभामुख देवराज घिमिरेले अनुरोध गरेका थिए। लगत्तै कांग्रेसका सांसदहरुले उभिएर नाराबाजी सुरु गरेका हुन्। पटकपटक सभामुखले विषयवस्तु प्रवेशका लागि आग्रह गरे पनि कांग्रेसका सांसदहरुले उभिएर विरोध गरिरहे।
सभामुख घिमिरेले कांग्रेसका सांसद तथा महामन्त्री गगन कुमार थापालाई समय दिए। बोल्ने क्रममा थापाले उभिएर समय मागेर बोल्नुपर्ने दिन आउला भन्ने आफूले नसोचेको तर बोल्न बाध्य भएको बताए।
सदनमा अन्य कुराहरु उठाउने तयारी भए पनि सदनमा घाँटी निमोठ्ने तयारी हुँदैछ भन्ने आभास भएपछि बोल्नुपरेको उनले बताए।
थापाले अहिले सदनमा जुन दृश्य भइरहेको छ त्यसको कारण प्रतिपक्ष नभएको बताएका छन्। ‘नेपाली कांग्रेस सदन चल्नुपर्छ भन्ने पक्षमा छ। कतिपय ऐनहरु सदनमा जाओस भन्ने थियो। अब हाम्रो माग एउटै हो सहकारी प्रकरणमा छानबिन समिति बनाओस् भन्ने हो,’ उनले भने।
समिति बनाउँदा कांग्रेस मात्र नभइ अन्य दलका प्रतिनिधि हुने हुँदा पनि गृहमन्त्री किन डराएको भन्दै थापाले प्रश्नसमेत गरे। महान्यायाधिवक्ताले अधिकारको दुरुपोग गरी लम्पसार बसेको उनको आरोप थियो।
उनले प्रमुख प्रतिपक्षले आरोप लगाइसकेपछि छानबिन समिति बनाउनु सरकारको कर्तव्य भएको थापाको भनाइ थियो। उनले संसदीय छानबिन समिति नबन्दासम्म कांग्रेसले सदन अगाडि बढ्न नदिने अडान राखे।
‘लागेका आरोपहहरुबारे संसदीय छानबिन समितिमा जवाफ आओस। समिति बनाउँ त्यसमा तपाईंहरुकै नेतृत्व हुनेछ। हामी हाम्रा कुरा राखौंला भन्दा किन डराइराख्नुपरेको हो?’ उनले भने, ‘संख्यात्मक हिसाबले हेप्न र पेल्न खोजियो। त्यसैले छानबिन समिति गठन नहुँदासम्म यो सदनको कामकारबाही अघि बढ्न सक्दैनन्।’
नाराबाजीकै बीच सभामुख घिमिरेले राष्ट्रपति कार्यालयबाट प्राप्त सूचना पढेर सुनाउने कोशिश गरे पनि कांग्रेसका सांसदहरुले रोष्टम अगाडि आएर नाराबाजी गरे। तर विरोध जारी नै रहेपछि सभामुखले बैठक १५ मिनेटका लागि स्थगित गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790409093.jpg)
-1786602170.png)
