काठमाडौं- प्रतिनिधि सभाका सांसदहरुले महत्वपूर्ण विधेयकहरु पारित नै नगरी संसद्को तेस्रो अधिवेशन अन्त्य भएको भन्दै असन्तुष्टि व्यक्त गरेका छन्। आइतबारको प्रतिनिधि सभा बैठकपछि सञ्चारकर्मीहरुसँग सांसदहरुले संसद्को तेस्रो अधिवेशन पनि महत्वपूर्ण विधेयकहरु पारित नगरी अन्त्य भएको बताए।
विधेयक पारित हुन नसक्नुमा राजनीतिक दलहरु नै जिम्मेवार रहेको सांसदहरुको भनाइ। विधेयक पारित हुन नसक्नुमा सत्तापक्षले प्रतिपक्ष र प्रतिपक्षले सत्तापक्षलाई दोष देखाएका छन्।
सञ्चारकर्मीहरुसँग कुराकानी गर्दै नेकपा(एमाले)का प्रमुख सचेतक महेश बर्तौलाले प्रमुख प्रतिपक्ष दल नेपाली कांग्रेसले सानाभन्दा साना विषयमा पनि संसद् अवरोध गरेका कारण धेरै विधेयकहरु पारित हुन नसकेको आरोप लगाए। उनले सरकारबाट हट्नासाथ विरोध गर्ने कांग्रेसको अलोकतान्त्रिक शैलीका कारण संसद्ले राम्रो काम गर्न नसकेको बताए।
नेपाली कांग्रेसका सांसद रामहरि खतिवडाले सरकार संसद्बाट भाग्नका लागि अधिवेशन अन्त्य गरिएको आरोप लगाए। उनले सरकारले लगानी सम्मेलनका लागि अध्यादेशबाट नियम ल्याउन लागेको भन्दै सो कुरा आफूहरुलाई मान्य नहुने बताए। उनले संसद्लाई बाइपास गरेर ल्याइने निर्णय आफूहरुलाई मान्य नहुने स्पष्ट पारे।
नेकपा(माओवादी केन्द्र)का सांसद देवेन्द्र पौडेलले बजेट अधिवेशनको तयारीका लागि संसदको चालु अधिवेशन अन्त्य गरिएको बताए। उनले विधेयकहरु पारित गर्ने कुरामा संसद्का दलहरुका बीचमा सहमति जुट्नुपर्नेमा त्यस्तो हुन नसकेका कारण संसदले धेरै विधेयक पारित गर्न नसकेको बताए। संसद् सुचारु गर्ने कुरामा प्रमुख प्रतिपक्ष दलको भूमिका कम भएको उनको भनाइ थियो।
राष्ट्रिय स्वतन्त्र पार्टीका प्रमुख सचेतक सन्तोष परियारले पुराना राजनीतिक दलहरुको असंसदीय गतिविधिका कारण संसद् बन्दी भएको आरोप लगाए। उनले गृहमन्त्री रवि लामिछानेलाई संसद्मा अस्वीकृत गरेर संसद्लाई गतिहीन बनाइएको बताए।
राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले संसद्को चालु अधिवेशन सकिनु नियमित प्रक्रिया भएको प्रतिक्रिया दिए।
नेकपा(एकीकृत समाजवादी)का सांसद अम्मरबहादुर थापाले विधेयक बनाउनका लागि संसद्को ध्यान गम्भीरतापूर्वक जान नसकेको बताए। उनले कानुन बनाउने मुल दायित्व बिर्सेर संसद्मा अन्य विषयमा मात्रै लडिराखिएको आरोप लगाए। उनले कानुन निर्माणको सन्दर्भमा दलहरुको कमी, कमजोरी भएको बताए।
नेपाल मजदुर किसान पार्टीका सांसद प्रेम सुवालले सत्तापक्ष र प्रमुख प्रतिपक्षसँग कुनै भिजन नभएका कारण संसद्बाट विधेयकहरु पारित हुन नसकेका बताए। उनले दलका नेताहरुलाई बोल्न नदिई संसद्को अधिवेशन अन्त्य गरिएको भन्दै असन्तुष्टि व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
