रास्वपालाई प्रदीप पौडेलको प्रश्न- निर्दोष भए छानबिन समिति बनाउन किन नमानेको?

राजनीति

नेपाल लाइभ सोमबार, चैत २६, २०८० ११:०९

काठमाडौं- नेपाली कांग्रेसका सांसद प्रदीप पौडेलले उपप्रधानमन्त्री तथा गृहमन्त्री रवि लामिछानेमाथि सहकारी प्रकरणमा संसदीय छानबिन समिति बनाउनुपर्ने मागबाट कांग्रेस पछि नहटेको बताएका छन्।

काठमाडौंमा सोमबार आयोजित नयाँ वर्षको शुभकामना आदानप्रदान कार्यक्रमलाई सम्बोधन गर्दै उनले नेपाली कांग्रेस छानबिन समिति निर्माण गर्ने अडानबाट पछि नहट्ने स्पष्ट पारे। उनले छानबिनका लागि निर्दोष छु भन्नेहरु छानबिन समिति बनाउन किन तयार नभएको भन्दै प्रश्न समेत गरे।

पौडेलले भने, ‘दोषी नभएको अवस्थामा छानबिन समिति बनाउन किन अफ्ठ्यारो? कुनै पनि घटना विशेषको सत्यतथ्य खोजिनुपर्छ। प्रश्न उठ्दैमा र आरोपहरु लाग्दैमा कोही दोषी हुन्छ भन्ने हुँदैन। तर आरोप लागिसकेपछि सत्यतथ्य छानबिन गर्ने काम सरकारको हो।’

सरकारले सुशासन कायम गर्न सुशासनका सबै मान्यतालाई अंगिकार गर्नुपर्ने बताउँदै उनले भ्रष्टाचार अन्त्य गर्न र सुशासन कायम गर्न आजसम्म भएका अनियमितताको छानबिन अपरिहार्य भएको उल्लेख गरे।

कांग्रेस नेता पौडेलले भने, ‘कुनै पनि घटना विशेषको तथ्यसत्य के हो भन्ने खोजिनुपर्छ। आरोप लागिसकेपछि त्यसको छानबिन गर्ने, सत्यतथ्य बाहिर ल्याउने काम सरकारको हो। सरकारले सुशासन कायम गर्ने हो भने सुशासनका सबै मान्यतालाई अंगिकार गरेको हुनुपर्छ। प्रश्न आफूलाई उठ्यो, त्यो कुराको वास्ता नगर्ने र अरुलाई प्रश्न उठाउने कुरा मात्रै सरकारमा बसेर स्वभाविक हुन सक्दैन।’

सांसद पौडेलले सरकारको संयन्त्र विश्वसनीय नभएकै कारण यसअघिका प्रकरणहरुमा पनि संसदीय छानबिन समितिहरु बन्ने गरेको जिकिर गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पेट्रोलियम पदार्थबाट ३७ अर्ब राजस्व सङ्कलन

९१ औं वर्षमा शुक्रराज ट्रपिकल तथा सरुवारोग अस्पताल : बढ्दै सेवाग्राही, विस्तार हुँदै सेवा

प्रधानमन्त्रीको पार्टीमा नै उकुसमुकुस भइरहेको छ, यो सरकार धेरै अगाडि जाँदैन : अध्यक्ष प्रचण्ड