काठमाडौं– अनमोल केसीको नयाँ सिनेमा ‘फर्की फर्की’को फर्स्टलुक पोस्टर सार्वजनिक भएको छ। आज परेको अनमोलको जन्मदिन पारेर निर्माण पक्षले पोस्टर सार्वजनिक गरेको हो। सार्वजनिक पोस्टरमा अनमोललाई मात्र स्थान दिइएको छ।
अनमोलले खेलको पात्रलाई दुई फरक अवस्थामा पोस्टरमा प्रस्तुत गरिएको छ जहाँ एकातर्फ अनमोल सोचमग्न छन् भने अर्कोमा कतै हिँडिरहेको देखाइएको छ। यस्तै, नेपथ्यमा घडिलाई बिम्बका रुपमा प्रयोग गरिएको छ। केही बिम्बले उनको चरित्रबारे संकेत गर्छ।
सामाजिक सञ्जालमा पोस्टर सार्वजनिक गर्दै अनमोलले ‘यो जादूको समय हो’ भनेर लेखेका छन्। यस्तै उनले आफ्नो पोस्टमा ‘सबैलाई यो देखाउनका लागि अब म प्रतिक्षा गर्न सक्दिनँ कि हामीले केमाथि काम गरिरहेका छौं’, समेत लेखेका छन्।
पोस्टर हेर्दा सिनेमामा अनमोल दुई फरक समयसन्दर्भका पात्र बनेका छन् भने संकेत मिल्दछ। यो सिनेमा जेठ १० गते रिलिज हुँदैछ। सुयोग गुरुङको निर्देशित 'फर्की फर्की'का निर्माता ओम प्रकाश अग्रवाल र रोहित अधिकारी हुन्।
सिनेमामा अनमोलका अलवा जसिता गुरुङ, कृष्ण मल्ल, निर्मल शर्मा, रवि काफ्ले, समृद्धि अर्याल आदि कलाकारको अभिनय छ। मनोज ओली र रामु न्यौपाने सिनेमाका सह-निर्माता हुन् भने मोती कार्की र अनिरुद्र गिरी कार्यकारी निर्माता हुन्।
निर्देशक गुरुङ स्वयंको कथा र पटकथा लेखन रहेको सिनेमाका क्यामराम्यान नरेन्द्र मैनाली हुन्। सिनेमालाई गोविन्द शाहीको काफिया फिल्मस्ले वितरण गर्दैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
