काठमाडौं– काठमाडौं उपत्यकाका कवाडी व्यवसायीहरुले बिरोध प्रदर्शन गरेका छन्। काठमाडौं महानगरपालिकाको मातहतमा रहेका वडा कार्यालयहरुले कवाडी हटाउने आदेश भन्दै कवाड व्यवसायीलाई ७ देखि ३५ दिनको म्याद तोकी निर्देशनात्मक अनुरोध भनि पत्र पठाएसँगै व्यवसायीहरुले बिरोध प्रदर्शन सुरु गरेका हुन्।
आइतबार उनीहरुले बुद्धनगरमा विरोध प्रदर्शन गरेका छन्। उनीहरुले न्यून आर्थिक अवस्थाका लाखौं नागरिकको रोजीरोटी खोसिने भन्दै निर्णय फिर्ता लिन आग्रह गरेका छन्। सरकारले सरसफाइका लागि लगानी गर्नुको साटो कवाड पेशाकर्मी तथा व्यवसायीले राज्यलाई तिरो तिरेर व्यवसाय चलाइरहँदा समेत विस्थापित बनाउन खोजेको आरोप लगाए।
आइतबार कवाडी समुदायको जुलुस शंखमुलदेखि त्रिपुरेश्वर, सुन्धारा हुँदै प्रदर्शनीमार्ग काठमाडौं पुगेर विरोध सभामा परिणत भएको थियो। संविधान, श्रम तथा रोजगारीको हक अधिकार, मानव अधिकार लगायत मूल्य र मान्यता विपरित उचित व्यवस्थापन बिना महानगरले कवाड हटाउने निर्णय गरेकोमा उक्त निर्णय फिर्ता नलिएसम्म आन्दोलन नरोक्ने उनीहरुको चेतावनी छ।
आन्दोलनका क्रममा बोल्दै नेपाल राष्ट्रिय कवाडी व्यापारी व्यवसायी संघका अध्यक्ष सरोज श्रेष्ठले आजको र्याली काठमाडौं महानगरपालिकाले व्यवसायलाई राज्यको कानुन विपरीत दमनकारी कार्यक्रम ल्याएकाले आन्दोलन गर्नुपरेको बताए।
महानगरले कवाडी पेशालाई अध्ययन नै नगरी गलत ढंगले व्याख्या गरी व्यवसायीलाई लखेटेको बताए। उनले यथाशिघ्र संवाद गरी व्यवसाय व्यवस्थित नगरे आन्दोलन झनै सशक्त रुपमा अघि बढाउने चेतावनी दिए। त्यस्तै आन्दोलनमा सहभागी सञ्जय साहले महानगर प्रमुख बालेन्द्र साहले कवाडी व्यवसायीलाई तल्लो वर्गको सोचेर भेट्न नदिएको आरोप लगाए। मेयरले लाखौं युवाको रोजगार खोस्ने अधिकार नरहेको जिकिर गरे।
आन्दोलनमा सहभागीहरुले ‘अदालतको निर्णयको सम्मान गरौं, अनधिकृत ढंगले कवाड हटाउने कार्य बन्द गरौं, कवाडमाथि डोजर चलाउने कार्य बन्द गर, कानुनी शासन लागू गर, कवाडी एकता जिन्दवाद’ लगायतका प्लेकार्ड र नारा लगाइ विरोध प्रदर्शन गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790066546.png)
-1790064844.png)
-1786602170.png)
-1789631269.jpg)
